Sut il tetg da la ARGE ALP vegnan realisadas dapi l'onn 1983 occurrenzas da sport che surpassan ils cunfins. Da questas occurrenzas fan part ils pajais ed ils chantuns sco la Baviera, la Lumbardia, il Tirol dal sid, il Trentino, Salzburg, il Tirol, il Vorarlberg, il Son Gagl, il Tessin ed il Grischun. L'onn 2006 ha la ARGE ALP ristgà da cumenzar cun in program nov. Avant devi concurrenzas en passa 20 disciplinas da sport. Ussa ha la ARGE ALP focusà ses program da sport sin 7 disciplinas. Tar ils sports d'enviern èn quai skis alpin, hockey sin glatsch e patinadi artistic, e tar ils sports da stad ballape, tir da sport, atletica leva e cursa d'orientaziun. Il motiv per renovar il program da sport è stà quel, che la ARGE ALP ha puspè vulì avair in instrument da promoziun efficazi per las disciplinas da sport ch'èn domiciliadas en il territori alpin e che vegnan pratitgadas il pli savens. Il success da l'onn da pilot ha dà raschun a la ARGE ALP. Da lur diesch pajais commembers èn sa participads circa 1400 sportistas e sportists a las sis occurrenzas. Sco giasts ha la ARGE ALP ultra da quai pudì beneventar delegaziuns da sport dal Liechtenstein, da Baden-Württemberg e da la Turgovia. Pervia da mancanza da naiv han ins displaschaivlamain stuì renunziar a la disciplina da skis alpin. Percunter han pudì vegnir realisads il turnier da hockey en il Tessin, il patinadi artistic en Baviera, il turnier da ballape en il Tirol dal sid, il tir da sport a Son Gagl, l'atletica leva en il Trentino e la cursa d'orientaziun en il Vorarlberg. En la classificaziun dals pajais ha la Lumbardia occupà – sco victura da la seria d'occurrenzas 2006/2007 – l'emprim rang avant il Tirol dal sid ed avant il Tessin. Ils ulteriurs rangs vegnan occupads da la Baviera e dal Trentino (4), dal Vorarlberg (6), dal Grischun (7), da Son Gagl (8), dal Tirol (9) e da Salzburg (10)

Las occurrenzas 2007/2008
Il grond success dal project da sport ha motivà la direcziun politica da la ARGE ALP – a chaschun da la 38avla conferenza da las scheffas e dals schefs da las regenzas a Bregenz il zercladur 2007 – da prolungar il project da sport per ulteriurs tschintg onns. Uschia presta la ARGE ALP er en l'avegnir ina contribuziun impurtanta per il svilup da disciplinas da sport ch'èn tipicas per il territori alpin e per la promoziun dal moviment en lur pajais commembers. Per l'onn da sport 2007/2008 ha la gruppa da project fixà – sut la direcziun dal chantun Grischun – ils suandants lieus e las suandantas datas d'occurrenza:

La stad 2008 vegn organisà e realisà – eventualmain en il Tirol dal sid – sco novum da l'onn da sport 2007/2008 da la ARGE ALP per l'emprima giada in'occurrenza per sportistas e per sportists che han in impediment spiertal. Sut www.argealp-sport.org sa chattan las indicaziuns davart las differentas occurrenzas da sport, ils formulars d'annunzia e las adressas da contact.

Gremi: uffizi per la scola populara ed il sport
Funtauna: rg uffizi per la scola populara ed il sport