Il referendum cunter la lescha da linguas dal chantun Grischun è reussì cun 3'736 suttascripziuns valaivlas. La regenza ha fixà il termin per la votaziun dal pievel davart quest project sin ils 17 da zercladur 2006.
Da la verificaziun che la chanzlia chantunala ha fatg da las suttascripziuns inoltradas sin las glistas da suttascripziuns attestadas è resultada ina differenza cun las indicaziuns dal comité da referendum. Effectivamain èn vegnidas inoltradas 3'742 e betg 3'749 suttascripziuns. Da quellas ston vegnir deducidas 13 suttascripziuns che n'èn betg valaivlas. Uschia restan anc 3'736 suttascripziuns valaivlas.

Nagin referendum cunter la revisiun parziala da la lescha da taglia
Cunter la revisiun parziala da la lescha da taglia n'è betg vegnì fatg in referendum. Il termin da referendum è scadì ils 31 da schaner 2007. Uschia pon entrar en vigur per il 1. da schaner 2008 sco planisadas las distgargias da las persunas giuridicas, dals conjugals e da las famiglias cun uffants, la liberaziun da la taglia sin l'ierta per la descendenza directa e numerusas ulteriuras meglieraziuns fiscalas. Singulas disposiziuns da la revisiun parziala ha la regenza mess en vigur retroactivamain gia per il 1. da schaner 2007.
Per il cumenzament da quest onn è entrada en vigur la lescha federala davart il partenadi registrà da pèrs da la medema schlattaina. Questa lescha pretenda ch'ils pèrs registrads vegnian tractads precis sco conjugals en dumondas fiscalas. La disposiziun correspundenta da la lescha da taglia sto pervia da quai vegnir messa en vigur retroactivamain. Er per il cumenzament da l'onn 2007 è entrada en vigur la lescha federala davart las investiziuns collectivas da chapital. Er questa lescha cuntegna differentas disposiziuns fiscalas ch'èn vegnidas surpigliadas da la lescha chantunala da taglia e che ston vegnir applitgadas a partir dal cumenzament da l'onn. E sco ultim duai ina precisaziun da la taxaziun d'obligaziuns cun tschains unics er entrar en vigur retroactivamain per pudair augmentar la segirezza giuridica en quest sectur.

Da vischnancas e da regiuns
- Val Müstair: Cun resalva che la confederaziun paja la contribuziun garantida als custs imputabels per la 35avla etappa da la meglieraziun generala vegn garantida ina contribuziun chantunala da maximalmain 612'500 francs a la societad da meglieraziun Val Müstair.
- Stierva: La revisiun parziala da la planisaziun locala da la vischnanca da Stierva, concludida ils 11 da settember 2006, vegn approvada.
- Churwalden: La revisiun parziala da la planisaziun locala da la vischnanca da Churwalden, concludida ils 29 da zercladur 2006, vegn approvada.
- Savognin: Il plan da zonas parzial 1:2'000 "revisiun parziala da la planisaziun locala, ospital" da la vischnanca da Savognin dals 17 da fanadur 2006 vegn approvà.
- Tumegl-Tràn-Sched: La revisiun parziala dals statuts dal consorzi da scola e da scolina Tumegl-Tràn vegn approvada. Quest consorzi porta da nov il num: "Schul- und Kindergartenverband Tumegl/Tomils-Trans-Scheid".

Contribuziuns chantunalas a differentas instituziuns
- Elavuraziun dal fundus da funtaunas: Per l'elavuraziun scientific-sistematica d'in fundus da funtaunas concernent il project "Bleibendes Verdienst für den Arbeiterstand. Historischer Rückblick auf 100 Jahre Katholische Pfarrei Igis-Landquart-Herrschaft" vegn concedida ina contribuziun unica da 10'000 francs. L'ediziun da questa publicaziun è previsa per il december 2008.

Projects da vias
La regenza ha approvà totalmain 1'325'000 francs per construir e per sanar il suandant traject da via:
- via da la Tumleastga Giuvaulta - Tusaun: lavurs d'impressari vi da la punt da duana da Seglias.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun