La regenza grischuna ha approvà il project dal sviament da Silvaplauna cun in tunnel d'ina lunghezza da 749 meters e cun custs da 64,4 milliuns francs. Uschia pon ins cumenzar gia durant l'onn current cun la projectaziun detagliada da las emprimas lavurs da construcziun.
La regenza ha approvà il project d'exposiziun dal sviament da Silvaplauna ed ha qua tras dà il signal da partenza per construir tant pli svelt il sviament. La dumonda da la finanziaziun n'è per il mument dentant betg anc reglada definitivamain. Tenor il plan secturial "traffic" da la confederaziun, ch'è n'è betg anc vegnì approvà, duai l'axa dal Güglia daventar ina part da la rait da las vias naziunalas. Uschia vegniss la construcziun dal sviament surpigliada cumplainamain da la confederaziun. Gia ditg è il chantun en contact cun la confederaziun per chattar ina soluziun transitorica areguard la finanziaziun che cuntenta tut las varts, e quai per pudair cumenzar cun las lavurs da construcziun il pli svelt pussaivel segund il giavisch da la populaziun. La regenza spera che l'urgenza dal sviament vegnia renconuschida da tut las persunas pertutgadas e ch'il project na vegnia betg retardà anc ina giada. Plinavant ha la regenza incumbensà l'uffizi da construcziun bassa dal Grischun da prender mesiras per proteger l'ambient, la natira e la cuntrada. L'uffizi da construcziun bassa vegn spezialmain incumbensà d'engaschar in accumpagnament ecologic da construcziun per projectar detagliadamain e per realisar il project.
Gia dapi l'onn 1969 vegn discussiunà da spustar la via dal Güglia en il center dal vitg. Il passadi stretg tras il vitg, collià cun la grevezza da traffic ch'è creschida enormamain dapi lezza giada e cumbinà cun undas da traffic fitg grondas durant las stagiuns, è ina chargia che n'è betg pli supportabla per la populaziun da Silvaplauna. Ils projects d'exposiziun dals onns 1984, 1987 e 1994 n'èn dentant betg vegnids persequitads vinavant, e quai d'ina vart pervia d'ina mancanza d'acceptanza, ma da l'autra vart er pervia da projects da vias pli impurtants sco Claustra u sco Flem. Il project d'exposiziun da l'onn 2005, ch'è ussa vegnì deliberà, sa basa per gronda part sin il project da l'onn 1994. Sin fundament da scleriments detagliads han ins optimà ils andaments da construcziun e la gestiun da material, e las pretensiuns a la segirezza en il tunnel èn vegnidas adattadas a las normas vertentas. Il project cun ina lunghezza da 1'470 meters cumenza sur Silvaplauna tar l'ultima part da la via dal Güglia ch'è gia amplifitgada e finescha tar la rundella planisada "Piz" a la via da l'Engiadina. La part principala dal sviament è il tunnel da Clavanövs cun ina lunghezza da 749 meters. Per la segirezza en il tunnel procuran duas galarias da segirezza ed ulteriurs indrizs, sco l'illuminaziun d'orientaziun e d'agid sco er l'indriz d'alarm d'incendi. Tras quai ch'il trassé vegn sbassà tranter il portal "Piz Sura" e la rundella "Piz" vegn reducida l'invista da la via. Las persunas che vivan en ils proxims conturns sco er persunas che vulan sa recrear là èn uschia protegidas meglier cunter las emissiuns dal traffic. La bilantscha da la grevezza per l'ambient che resulta dal traffic sin via a Silvaplauna vegn meglierada cleramain tras il sviament.
Suenter l'emprima badigliada vegnan construids sco emprim la rundella "Piz" ed il reservuar d'aua, ed i vegnan fatgas las emprimas exchavaziuns. Suenter po vegnir cumenzà cun las exchavaziuns per il tunnel. Cunquai che la perfuraziun dal tunnel nà da la storta da Pignia è inclinada, èsi pussaivel da transportar directamain il material a la deponia da Polaschin a la via dal Güglia. Il betun ed il material da fundament vegnan elavurads en il territori da Polaschin e furnids al plazzal. Questa gestiun da material protegia il vitg per gronda part cunter il traffic dal plazzal. Suenter las lavurs da construcziun en il tunnel vegnan realisads respectivamain terminads ils trajects averts sur e sut il tunnel. Las lavurs da construcziun per il sviament duran var 7 onns. Ils custs ch'èn s'augmentads a 64,4 milliuns francs en cumparegliaziun cun il project d'exposiziun da l'onn 1994 resultan en emprima lingia da las pretensiuns pli grondas che vegnan fatgas a la segirezza en il tunnel, da la chareschia sco er da la taglia sin la plivalur ch'è vegnida introducida en il fratemp.

Gremi: regenza
Funtauna: rg chanzlia chantunala dal Grischun