La cumissiun da gestiun dal cussegl grond (CdG) e la regenza grischuna vulan rinforzar l'independenza da la controlla da finanzas e concretisar la posiziun da la controlla da finanzas sin il stgalim da la lescha. Plinavant duain vegnir scleridas las dependenzas en il sectur administrativ. En quest connex duai vegnir resguardà er il svilup tar las controllas da finanzas en il rest da la Svizra. Per quest motiv è la lescha davart las finanzas dal chantun Grischun vegnida suttamessa ad ina revisiun ed igl èn vegnidas integradas disposiziuns cumplessivas davart la surveglianza da finanzas. Quest project va ussa en consultaziun. Suenter duai vegnir elavurada ina missiva ch'il cussegl grond vegn a tractar en la sessiun d'avust 2007. Igl è previs da metter en vigur las parts principalas per il 1. da schaner 2008.
La nova regulaziun da la surveglianza da finanzas sa basa fitg sin la lescha da model da l'uniun professiunala da las controllas da finanzas da la Svizra. En cumparegliaziun cun la regulaziun actuala vegn rinforzada l'independenza da la controlla da finanzas, quai ch'è da gronda impurtanza per sia activitad da controlla e per sia vardaivladad. La controlla da finanzas duai dentant - sco quai ch'igl è usità en Svizra - esser activa vinavant sco organ spezialisà da la surveglianza da finanzas per la CdG e per la regenza.
Ina da las novaziuns da la revisiun prevesa che la regenza elegia la manadra u il manader da la controlla da finanzas sin proposta (proposta electorala) d'in gremi da selecziun paritetic che consista da represchentantas e da represchentants da la regenza e da la CdG. Er sche la regenza revochescha la manadra u il manader da la controlla da finanzas, ha quai lieu sin proposta dal gremi communabel. Areguard las cumpetenzas d'expensas ed areguard ils surpassaments da credits duai la controlla da finanzas plinavant survegnir il medem status sco in departament. Ultra da quai duai la controlla da finanzas sustegnair l'activitad da surveglianza da la CdG, e quai resguardond l'incumbensa da questa cumissiun. La controlla da finanzas dat a la CdG tut las infurmaziuns che servan a la surveglianza suprema. Da nov duai l'organisaziun dal secretariat da la CdG esser separada cleramain da la controlla da finanzas. En l'avegnir na duai la controlla da finanzas betg pli esser cumpetenta per manar il secretariat da la CdG. Igl è previs d'integrar il secretariat da la CdG en il secretariat dal cussegl grond. La finala duai il rapport da gestiun da la controlla da finanzas vegnir publitgà da nov. Quest rapport sto dentant tegnair quint dal secret d'uffizi e dals dretgs persunals.
Ils documents da consultaziun pon vegnir chargiads giu da la pagina d'internet dal departament da finanzas e vischnancas sut l'adressa www.dfg.gr.ch. La consultaziun dura fin ils 26 da mars 2007.

Gremi: departament da finanzas e vischnancas
Funtauna: rg departament da finanzas e vischnancas