Il chantun Grischun duai sa participar cun ina contribuziun da maximalmain 4 milliuns francs vi da la sanaziun finanziala da la "HTM-Immobilien AG", la possessura da la chasa da scola d'hotellaria e da l'internat a Passugg. Cun quel import vul il chantun gidar a garantir l'existenza da la chasa, per che la purschida da la scola d'hotellaria a Passugg restia, ina purschida ch'è impurtanta ord vista da l'economia publica. La regenza propona en sia missiva ch'il chantun sa participeschia finanzialmain a la sanaziun da la "HTM-Immobilien AG".
Il cussegl grond vegn a tractar la fatschenta en la sessiun d'avrigl 2007. Las scolaziuns da la swiss school of tourism and hospitality SSTH a Cuira ed a Passugg sin il stgalim da la furmaziun professiunala da basa e da la furmaziun professiunala superiura gidan considerablamain a promover la generaziun giuvna e la furmaziun supplementara en questa branscha grischuna da gronda impurtanza. Il manaschi d'instrucziun da questa scola d'hotellaria che lavura cun success dapi blers onns sa finanziescha cun meds privats e publics. Dapi l'onn 1988 serva l'anteriur hotel da cura Passugg sco chasa da scola e sco internat. Quai pussibilitescha ina scolaziun orientada als basegns dal mund da lavur. La proprietaria da la chasa da scola che vegn prendida a tschains da la SSTH ha realisà ils ultims diesch onns lavurs da renovaziun e d'engrondiment cun custs d'investiziun da bunamain 18 milliuns francs. Questas investiziuns architectonicas èn vegnidas sustegnidas da la confederaziun e dal chantun cun contribuziuns da construcziun en la summa da 6,6 milliuns francs.
Sin fundament da la grevezza considerabla cun chapital ester e sin fundament dal basegn cumprovà da mantegnair l'immobiglia na po la "HTM-Immobilien AG" betg pli cumpensar ses custs cun il tschains da locaziun da la SSTH. Perquai ha ella elavurà in concept da sanaziun. Per ch'ils custs annuals da reparatura e da mantegniment possian vegnir finanziads a lunga vista e per che l'existenza da la chasa da scola possia vegnir garantida, sto vegnir reducida la grevezza considerabla cun chapital ester gia durant l'onn current. Sco finamira vegn avisada ina reducziun dad 8 milliuns francs. La participaziun chantunala da 4 milliuns francs premetta che las donaturas e ch'ils donaturs dals emprests da daners suttascrivian ina renunzia a la pretensiun da totalmain er 4 milliuns francs.
Las consequenzas persunalas e per l'economia publica fissan considerablas per la regenza, sche la scola vegniss serrada. Il manaschi cumplessiv da la scola cumpiglia 64 plazzas a temp cumplain e generescha ina svieuta annuala da ca. 13,5 milliuns francs. A l'avis da la regenza po la participaziun dal chantun a la sanaziun da las finanzas da la chasa da scola - in institut da scolaziun excellentamain adattà - cuntinuar ses manaschi er en il futur e garantir l'existenza da la scola d'hotellaria a Passugg. Il conclus dal cussegl grond ch'è vegnì proponì da la regenza per ina participaziun dal chantun a la sanaziun finanziala da la chasa da scola d'hotellaria a Passugg è suttamess al referendum da finanzas facultativ.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun