La regenza grischuna ha deliberà la missiva per ina lescha davart la furmaziun professiunala e davart purschidas da furmaziun cuntinuanta. Il cussegl grond vegn a tractar la fatschenta en la sessiun d'avrigl 2007.
La revisiun totala ch'è planisada vegn fatga en emprima lingia perquai che las disposiziuns da la legislaziun chantunala ston vegnir adattadas a las midadas da la lescha federala davart la furmaziun professiunala (LFPr) ed a la nova concepziun da la gulivaziun da finanzas e da las incumbensas tranter la confederaziun ed ils chantuns (NGF). La lescha cumpiglia en il sectur da la furmaziun professiunala da nov er ils secturs da la sanadad, dals fatgs socials, da l'art sco er da l'agricultura e da la selvicultura. En il sectur da las purschidas da furmaziun cuntinuanta cuntegna ella plinavant regulaziuns davart il sectur terziar inclusiv las scolas autas. En general duai en quest connex vegnir dà dapli pais a la finamira da promover la cumpetitivitad da persunas sin il martgà da lavur ed en la professiun.
Sco lescha executiva dal dretg federal concretisescha la lescha chantunala las directivas dal dretg federal e fixescha las cumpetenzas. La furmaziun professiunala vegn definida sco incumbensa communabla da la confederaziun, dals chantuns e da las organisaziuns dal mund da lavur. Er en il chantun vegn dà gronda impurtanza a la collavuraziun cun las partenarias e cun ils partenaris dal mund da lavur. Cun ina lescha da basa flexibla duai la regenza survegnir la libertad necessaria per pudair reagir sin las novaziuns sin plaun federal sco er sin ils svilups en la societad ed en il mund da lavur, e quai en moda svelta e cunvegnenta.
In ulteriur punct central da quest project è il sistem da finanziaziun ch'è vegnì simplifitgà. A partir dal 1. da schaner 2008 vegn la confederaziun a midar dal subvenziunament che s'orientescha vi dals custs a contribuziuns pauschalas per contract d'emprendissadi che s'orientescha vi da las incumbensas. Cun agid d'in sistem da finanziaziun simplifitgà duai questa midada vegnir realisada en il Grischun uschia che las contribuziuns chantunalas cuntegnan da nov er la part da la confederaziun, senza che la midada da sistem chaschunia ina chargia supplementara per las vischnancas. Da nov prevesa la lescha la pussaivladad ch'il chantun possia far contracts davart incaricas da prestaziun cun las purschidras e cun ils purschiders da prestaziuns. Las instituziuns ch'èn responsablas per las differentas scolas professiunalas spezialisadas na duain percunter betg vegnir midadas.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun