La regenza grischuna propona al cussegl grond da recumandar al pievel da refusar l'iniziativa chantunala dal pievel per in fond d'innovaziun per il Grischun. La regenza ha deliberà la missiva correspundenta per mauns dal cussegl grond. Igl è previs da tractar questa fatschenta durant la sessiun d'avust 2007.
L'avrigl 2005 aveva la giuvna PCD dal Grischun lantschà ina iniziativa per stgaffir in fond d'innovaziun per il Grischun. Quel duai vegnir finanzià or dal retgav finanzial extraordinari da la banca chantunala grischuna. L'iniziativa dal pievel per in "fond d'innovaziun per il Grischun" è vegnida inoltrada ils 27 da mars 2006 a la chanzlia chantunala ed è reussida cun 3'219 suttascripziuns. L'iniziativa formulescha l'intent da duvrar ils meds finanzials èn moda relativamain vasta. Ils meds finanzials duain vegnir utilisads "a favur da projects extraordinaris da valur agiuntada, da forza innovativa e da persistenza particulara per l'avegnir dal Grischun e da sia economia publica, e quai cun in'orientaziun a lunga vista".
Sco quai che la regenza scriva en sia missiva, èn ils projects ch'èn previs dal cussegl grond e da la regenza per gronda part identics cun l'intent da l'iniziativa. La sessiun da zercladur 2006 ha il cussegl grond tractà l'utilisaziun dal retgav finanzial extraordinari da la banca chantunala grischuna per projects innovativs. El ha concludi da duvrar ils meds finanzials da circa 100 milliuns francs per ina fundaziun per innovaziun, per svilup e per perscrutaziun (30 milliuns francs), per la renovaziun dals vaguns da la viafier retica (22 milliuns francs), per la refurma da las structuras communalas (20 milliuns francs), per structuras turisticas cumpetitivas (18 milliuns francs) e per novas colliaziuns da traffic (10 milliuns francs). Per realisar ils projects "fundaziun per innovaziun, per svilup e per perscrutaziun" e "novas colliaziuns da traffic" ha la regenza suttamess en il fratemp al cussegl grond ina missiva davart la revisiun parziala da la lescha per promover il svilup economic en il chantun Grischun. En quella vegn reglada la basa giuridica per quests dus projects innovativs. Il cussegl grond vegn a tractar questa fatschenta durant la sessiun d'avrigl 2007.
Schebain ch'igl ha dà il december 2006 discurs da la regenza cun il comité d'iniziativa, insista quel per entant sin l'iniziativa. Tenor las explicaziuns da las iniziantas e dals iniziants duai l'iniziativa vegnir retratga pir, suenter che la revisiun parziala da la lescha per promover il svilup economic en il chantun Grischun è vegnida deliberada dal cussegl grond durant la sessiun d'avrigl 2007, e quai en cas ch'il cussegl grond suonda las propostas da la regenza. Tuttina è la regenza obligada tenor la lescha da deliberar la missiva correspundenta davart l'iniziativa per mauns dal cussegl grond fin il pli tard ils 27 da mars 2007. Perquai ch'ils projects proponids èn per gronda part identics cun l'intent da l'iniziativa, desista la regenza da far ina proposta supplementara respectivamain ina cuntraproposta.
Chanzlia chantunala dal Grischun

Gremi: regenza
Funtauna: rg chanzlia chantunala dal Grischun