La cumissiun predeliberanta dal cussegl grond ch'è vegnida nominada aposta per quest intent ha predeliberà per mauns dal cussegl grond la missiva da la regenza davart l'engrondiment e davart l'adattaziun dals edifizis dal lieu da lavur e d'occupaziun ARBES a Giuvaulta. La cumissiun vegn presidiada dal deputà Markus Clavadetscher. A la sesida è sa participà er il cusseglier guvernativ Stefan Engler.
Sco che la regenza menziunescha en sia missiva ha il lieu da lavur e d'occupaziun (ARBES) dals servetschs psichiatrics dal Grischun (SPGR) pudì vegnir avert l'onn 1995, suenter ch'il cussegl grond aveva approvà da sanar la chasa d'abitar e da tgira ch'era vegnida construida ils onns 1973/1974. Sco consequenza da quai ha il center da dimora e d'occupaziun pudì vegnir manà cun gruppas d'abitar famigliaras pli pitschnas e cun las pussaivladads d'occupaziun correspundentas.
Gia suenter in pèr onns èsi sa mussà che la dumonda per plazzas da lavur protegidas per umans cun in impediment psichic creschiva - analogamain al svilup naziunal -cuntinuadamain dapi la fundaziun dal ARBES. Ils ultims onns ha la ARBES perquai gì in grad d'occupaziun da mintgamai passa 110 pertschient. Questa situaziun sa preschenta anc oz uschia. Pervia da la gronda occupaziun sa chattan actualmain ulteriuras diesch persunas sin la glista da spetga.
Dapi ch'il ARBES è vegnì avert l'onn 1995 èn - ultra da la dumonda per plazzas da lavur protegidas - sa midadas decisivamain er las pretensiuns. Quellas èn sa sviluppadas davent d'occupaziuns simplas da las abitantas e dals abitants vi a la promoziun da la prestaziun tras activitads productivas. Ed adina cur che quai è pussaivel, vegn prendida en mira ozendi l'integraziun professiunala.
Per realisar il project da construcziun sto vegnir fatg quint cun custs da 2,6 milliuns francs. Sin fundament da la basa legala decisiva vegn la confederaziun a sa participar cun ca. 750'000 francs vi da quests custs. Il rest da ca. 1,85 milliuns francs va a quint dal chantun; da quai pon 1,3 milliuns francs vegnir cuvrids tras ils SPGR cun agid da retenziuns che ston vegnir schliadas.
Suenter avair tractà intensivamain il project ha la cumissiun deliberà unanimamain la missiva da la regenza per mauns dal cussegl grond. Quel vegn a tractar il project en sia sessiun da zercladur 2007.

Gremi: cumissiun predeliberanta dal ARBES
Funtauna: rg cumissiun predeliberanta dal ARBES