La regenza grischuna s'engascha per il fatg che l'armada dastga far er en l'avegnir lavurs per autoritads civilas en il rom da ses servetschs d'assistenza. En il rom da la revisiun da la lescha militara durant la sessiun da stad aveva il cussegl naziunal fatg ina cumplettaziun tenor la quala i fiss stà exclus per l'armada da far servetschs d'assistenza previsibels e permanents. En ina brev a las commembras ed als commembers dal cussegl dals chantuns crititgescha la regenza questa decisiun dal cussegl naziunal. La consequenza da quai fiss che conferenzas internaziunalas a Genevra, occurrenzas grondas da sport sco la euro 2008, il forum economic mundial WEF a Tavau ed autras occurrenzas ch'èn d'in interess naziunal e che han ina dimensiun cumparegliabla na pudessan betg pli vegnir realisadas. Ils chantuns n'èn betg en cas da metter a disposiziun las forzas polizialas ch'èn necessarias per garantir ina realisaziun regulara da talas occurrenzas.
Cun satisfacziun ha la regenza prendì enconuschientscha da la decisiun da la cumissiun predeliberanta dal cussegl dals chantuns da permetter a l'armada da far er en l'avegnir servetschs d'assistenza previsibels e permanents. La regenza supplitgescha las commembras ed ils commembers dal cussegl dals chantuns da sustegnair questa decisiun da la cumissiun. Uschia possian vegnir realisadas en Svizra er en l'avegnir occurrenzas grondas naziunalas ed occurrenzas cun in'attracziun internaziunala punctuescha la regenza en sia brev a las commembras ed als commembers dal cussegl dals chantuns.

Da vischnancas e da regiuns
- Tavau: Il project "via da guaud Bünda-Ischlag-Büelenberg" da la vischnanca da Tavau vegn approvà e sustegnì cun ina contribuziun da maximalmain 1'461'600 francs.
- Consorzi per aua persa dal Partenz central: Al consorzi per aua persa dal Partenz central vegn garantida ina contribuziun da maximalmain 151'735 francs per sanar e per engrondir la serenera da Dalvazza.
- Lumbrein: La construcziun nova da la senda da viandar da la Pro Val Lumnezia da Lumbrein a Sontg Andriu cun la punt sur la Val Mulin vegn sustegnida cun ina contribuziun da 74'000 francs.
- Fläsch: En il vitg da Fläsch vegn fixada la sveltezza maximala a 30 km/h ed introducida ina "zona da tempo 30", e quai cun integrar la via chantunala. Il medem mument vegn la signalisaziun dal cumenzament dal vitg tar l'entrada dal vitg al vest spustada per circa 50 meters en direcziun da Bad Ragaz. Sin la via dal St. Luzisteig vegn ultra da quai la zona "en il vitg" existenta nua ch'i vala la sveltezza maximala da 60 km/h spustada per ca. 100 m en direcziun da Balzers.
- Saas: La revisiun parziala da la planisaziun locala da la vischnanca da Saas dals 29 da zercladur 2007 vegn approvada cun tschertas resalvas.
- Tarasp: La planisaziun d'utilisaziun "hotel Tarasp" che sa referescha al project e ch'è vegnida decidida ils 25 da zercladur 2007 da la vischnanca da Tarasp vegn approvada cun cundiziuns e cun resalvas sco er cun tschertas correcturas.

Contribuziuns chantunalas a differentas instituziuns
- Fundaziun ARGO: Il project ch'è vegnì inoltrà da la ARGO fundaziun "center grischun per lavuratoris e per dimoras da persunas impedidas" e che cumpiglia ina midada da construcziun e la sanaziun da la cantina dals lavuratoris da la ARGO a Cuira vegn approvà. Als custs imputabels vegn garantida ina contribuziun da construcziun da maximalmain 248'640 francs.
- Uniun da las ludotecas dal Grischun: Per l'onn da gestiun 2008 survegn l'uniun da las ludotecas dal Grischun ina contribuziun da sustegn da 20'000 francs.

Projects da vias
La regenza ha approvà totalmain 2'680'000 francs per construir e per sanar ils suandants trajects da vias:
- via naziunala A13: lavurs d'impressari, tunnel dal San Bernardin
- via da la Lumnezia: lavurs da cuvrida, Glion - Cumbel
- via da Sursaissa: lavurs da cuvrida, Glion - Flond
- via dal Partenz: lavurs d'impressari, sviament da Küblis

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun