L'indemnisaziun da las advocatas e dals advocats per defensiuns
uffizialas e per represchentanzas legalas gratuitas sco er
l'uschenumnada indemnisaziun da partida en proceduras giudizialas duain
vegnir regladas da nov. La regenza grischuna ha deliberà la missiva
correspundenta tar la revisiun parziala da la lescha davart las
advocatas ed ils advocats per mauns dal cussegl grond. Il parlament vegn
a tractar questa fatschenta en la sessiun d'october 2008.
Questas adattaziuns èn necessarias, perquai che la federaziun
grischuna d'advocatas e d'advocats ha stuì abolir la fin da l'onn 2007
las anteriuras tariffas d'onurari sin ordinaziun da la cumissiun da
concurrenza. Qua tras resulta ina largia legislativa per il Grischun.
Betg pertutgadas da quai n'èn relaziuns contractualas da dretg privat
tranter la clientella e las advocatas ed ils advocats. Qua po l'onurari
vegnir concludì libramain. In basegn d'agir areguard ina regulaziun
statala da l'indemnisaziun da las advocatas e dals advocats exista
percunter tar la defensiun uffiziala, tar la represchentanza legala
gratuita en la giurisdicziun civila ed administrativa sco er tar
l'indemnisaziun che vegn fixada da la dretgira per la partida gudagnanta
en proceduras giudizialas. Qua s'exprima la regenza cunter ina soluziun
da tariffas inflexiblas. Empè da quai duai l'indemnisaziun sa drizzar
tenor il temp ch'è necessari per manar in process en moda adequata.
La revisiun parziala da la lescha chantunala davart las advocatas ed
ils advocats stgaffescha las premissas legalas, per che la regenza
possia reglar ils detagls da l'urden d'onurari per las advocatas e per
ils advocats en in'ordinaziun. Tras la revisiun parziala da la lescha
davart las advocatas ed ils advocats duai la finala vegnir reglada da
nov la restituziun dals custs per la giurisdicziun gratuita. Da nov
survegn l'administraziun chantunala da taglia la cumpetenza d'incassar
questas restituziuns, sche la partida, a la quala la represchentanza
legala era vegnida permessa, vegn en relaziuns economicas favuraivlas.
Per quest intent po ella er revegnir a las datas fiscalas. La finamira è
quella da far valair pli effizientamain las restituziuns.
Persuna che dat infurmaziuns:
cussegliera guvernativa Barbara Janom Steiner, scheffa dal
departament da giustia, segirezza e sanadad, tel. 081 257 25 01
Gremi: regenza
Funtauna: rg chanzlia chantunala dal Grischun