L'expertisa ch'è vegnida fatga suenter che la Espros Photonics SA (epc) ha gì tschernì ses lieu ordaifer il Grischun, è da l'avis ch'il proceder e che las stentas da la promoziun da l'economia sajan adequats. La regenza grischuna ha prendì enconuschientscha da questa expertisa ch'è vegnida redigida d'in expert independent. Cun satisfacziun constatescha ella ch'ils andaments e che las modas da lavurar en il chantun n'hajan betg chaschunà reclamaziuns da num. La regenza examinescha ussa las propostas da l'expertisa.

L'october 2007 ha la Espros Photonics SA (epc) decidì da realisar sia nova fabrica da semiconducturs en il Gonzen sper Sargans. En connex cun questa decisiun èsi vegnì renfatschà cunzunt a la regenza grischuna d'avair suttamess a questa firma - en il rom da la promoziun dal lieu - in'offerta finanziala nunsuffizienta. La promoziun da l'economia è vegnida crititgada areguard la professiunalitad ed areguard il cumportament envers la clienta. Sin quai ha la regenza incumbensà in expert independent d'analisar tant il cas concret sco er la direcziun da la promoziun da l'economia en il Grischun en general. Sco expert è vegnì engaschà prof. dr. Hans Peter Wehrli.
L'expertisa è ussa avant maun ed è vegnida preschentada a la regenza. Ella vegn a la conclusiun che l'andament da la procedura da domiciliaziun saja stà en urden. La moda da proceder e las stentas da l'uffizi per economia e turissem e dal chantun sajan stadas adequatas per quest cas. En il context da differents facturs d'influenza hajan ils uffizis lavurà cun in senn professiunal, menziunescha l'expertisa. L'engaschi avess dentant pudì vegnir communitgà pli avertamain. Tut en tut sajan ils basegns da la epc vegnids sclerids e registrads suffizientamain. Pervia da las aspectativas implicitas n'hajan quels dentant betg pudì vegnir ademplids cumplettamain.
Per optimar las stentas da domiciliaziun en il chantun propona l'expert tranter auter da coordinar meglier las prestaziuns da servetsch entaifer l'administraziun, e quai cun la finamira da furnir soluziuns che correspundan a la clientella ed al temp. Ultra da quai stoppia vegnir examinà, nua ch'ils process possian vegnir simplifitgads. In sistem pragmatic d'in "one-stop-shop" (vul dir d'in unic post responsabel) pudess uschia rinforzar il dialog tranter ils uffizis participads ed accelerar las proceduras. En cas da basegn duessan plinavant vegnir consultads a temp cussegliadras e cussegliaders. La regenza vegn ad examinar questas propostas.

Infurmaziun per las medias:
L'expertisa po vegnir chargiada qua giu da l'internet (per tudestg).

Gremi: regenza
Funtauna: rg chanzlia chantunala dal Grischun