La regenza grischuna sustegna da princip la revisiun totala da
l'ordinaziun davart la maturitad professiunala federala che vegn
proponida da la confederaziun. Sco che la regenza scriva en sia resposta
da consultaziun, è la maturitad professiunala in model da success cun
ina istorgia che n'è anc betg uschè veglia. La finamira da la revisiun
totala è quella da tegnair la qualitad da la scolaziun e la part da las
persunas che fan ina maturitad professiunala sin in aut nivel. En vista
al studi ad ina scola auta professiunala ston vegnir adattadas las
finamiras da la furmaziun generala extendida. Quai ha consequenzas per
la concepziun da l'instrucziun e per la purschida da curs da furmaziun.
Per la regenza fissi dentant fauss da manevrar la maturitad
professiunala en la vischinanza da la maturitad gimnasiala e da
relativar uschia ses profil. Actualmain sa cumpletteschan questas duas
vias da scolaziun en moda optimala ed in'extensiun da la moda da lavurar
interdisciplinara sin quest stgalim da scolaziun na resguarda la regenza
sco betg adequata a l'intent. Ultra da quai tema la regenza che
l'individualisaziun e che la differenziaziun tar las scolaziuns da
maturitad professiunala pudessan chaschunar problems en il chantun
Grischun. Gist las scolas da maturitad professiunala pitschnas e
periferas na pon strusch porscher tut las novas cumbinaziuns da
scolaziun pussaivlas. Da la revisiun sto la finala dentant er resultar
ina plivalur per il mund da lavur.
Da vischnancas e da regiuns
Pitasch: A la vischnanca da Pitasch vegn garantida ina contribuziun
dad 111'150 francs als custs cun dretg da survegnir contribuziuns per
sanar e per engrondir il stabiliment dal provediment d'aua.
Brusio: La revisiun parziala da la planisaziun locala da la
vischnanca da Brusio dals 16 da december 2007 vegn approvada cun
intginas cundiziuns.
Contribuziuns chantunalas a differentas instituziuns
Halla d'events da curling a Flem: A la Waldhaus Flims Mountain
Resort SA vegn garantida - sin basa dal concept per implants da sport
d'impurtanza chantunala (CISIC) - ina contribuziun dad 1'500'000 francs
per construir la halla d'events da curling a Flem. La premissa è che la
finanziaziun totala reusseschia.
Fundaziun Flury a Schiers: A la fundaziun Flury a Schiers vegn
garantida ina contribuziun chantunala da maximalmain 1'450'000 francs
per engrondir e per midar la construcziun da la chasa da persunas
attempadas e da tgira "Sassauna" a Schiers sco er per substituir
l'edifizi che cuntegna la cuschina cuminaivla da la chasa da persunas
attempadas e da tgira sco er da l'ospital regiunal dal Partenz a
Schiers.
Promoziun da la cultura: La regenza ha concedì contribuziuns da
totalmain 98'000 francs per promover 12 occurrenzas ed ovras culturalas.
Project "Scolas a Berna": Il project "Scolas a Berna" da l'uniun cun
il medem num vegn sustegnì cun ina contribuziun unica da 20'000 francs.
La premissa è che almain 15 chantuns sa participeschian.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun