Ils 3 d'october 2008 a las 18.00 vegnan preschentadas en la biblioteca chantunala dal Grischun duas publicaziuns davart l'istorgia dal Grischun e dals territoris cunfinants durant il temp medieval tempriv. I refereschan dr. Georg Jäger per l'institut per la perscrutaziun da la cultura grischuna, prof. dr. Reinhold Kaiser, autur, dr. Karin Fuchs, editura e dr. Hannes Steiner, editur. Robert Grossmann enramescha l'occurrenza cun musica istorica da lauta.

"Schrift, Schriftgebrauch und Textsorten im frühmittelalterlichen Churrätien", dat la prioritad a las scrittiras tradiziunalas che derivan dal spazi cultural da la Currezia dal 7. fin il 9. tschientaner. Durant la perioda da l'antica tardiva e durant il temp medieval tempriv sa chattava la Currezia - areguard la politica, l'economia e la cultura - là, nua che territoris da different caracter en il nord ed en il sid da las Alps sa scuntravan. Questa constellaziun ha fixà en moda decisiva il svilup da la scrittira, il diever da la scrittira e las sorts da texts e sveglia dumondas davart l'autonomia e davart las influenzas estras, davart la cuntinuitad e davart las ruttadiras entaifer la cultura da scriver ed entaifer l'istorgia culturala da la Rezia. Expertas cumprovadas ed experts cumprovads da las disciplinas archeologia, istorgia, istorgia d'art, giurisprudenza e da las scienzas auxiliaras da l'istorgia s'occupan da perditgas da texts liturgics e hagiografics, d'inscripziuns, da texts giuridics sco er da funtaunas archeologicas.
Parallelamain cumpara la nova ediziun da l'ovra repassada e cumplettada "Churrätien im frühen Mittelalter" da Reinhold Kaiser. L'autur preschenta tschintg tschientaners da l'istorgia dal temp medieval tempriv da la Currezia, e quai cun agid da documents, d'inscripziuns, da nums da lieus e da persunas, da chats da fossas e d'abitadis, d'edifizis sacrals u da picturas da paraid e dals resultats da las disciplinas istoricas vischinas. Tge impurtanza ha gì il declin da l'imperi roman per la Rezia? Tge midadas han gì lieu en ils secturs da la politica, da l'economia e dal mund da viver? E tge consequenzas ha gì il declin da l'imperi roman en vista a la baselgia, a la cultura ed a la lingua? En la nova publicaziun tracta Reinhold Kaiser questas dumondas e s'occupa en moda critica cun las perscrutaziuns da l'ultim decenni. Uschia metta el il text da l'emprima ediziun en connex cun las novas enconuschientschas ed accentuescha ils resultats ils pli novs da la perscrutaziun.

Gremi: biblioteca chantunala dal Grischun
Funtauna: rg biblioteca chantunala dal Grischun