La regenza grischuna ha avert la consultaziun tar la legislaziun executiva chantunala da la lescha federala davart il provediment d'electricitad (LPrEl GR). La finamira è quella da stgaffir ina legislaziun effizienta per exequir las incumbensas che vegnan surdadas da la confederaziun als chantuns. Ultra da quai duain tut las disposiziuns dal sectur dal provediment d'electricitad vegnir reunidas en ina lescha.
Ils 23 da mars 2007 han las chombras federalas deliberà la lescha davart il provediment d'electricitad. Questa lescha regla il provediment d'electricitad svizzer ed è entrada en vigur bunamain dal tuttafatg il 1. da schaner 2008. Excepziuns èn las disposiziuns davart il dretg d'access a la rait per consumentas grondas e per consuments gronds sco er l'indemnisaziun da l'electricitad furnida per la forza electrica or d'energias regenerablas. Questas disposiziuns entran en vigur il 1. da schaner 2009.
La lescha federala davart il provediment d'electricitad deleghescha differentas incumbensas als chantuns. Per exequir questas incumbensas èsi necessari da relaschar ina legislaziun executiva chantunala che regla ils suandants secturs:
- designar ils territoris da provediment;
- far valair la garanzia da colliaziun en cas da dispita;
- disponer la colliaziun da consumentas finalas e da consuments finals ordaifer il territori da provediment;
- relaschar disposiziuns davart colliaziuns ordaifer la zona da construcziun sco er davart ils custs da talas, sche quels na vegnan betg reglads dal legislatur federal;
- reducir differenzas sproporziunadas tranter las tariffas per utilisar las raits.

Per la revisiun stat a disposiziun fitg pauc temp. Perquai dura la consultaziun mo fin ils 2 da december 2008. Suenter sto vegnir redigida la missiva per il cussegl grond. La discussiun en il cussegl grond è planisada per la sessiun d'avrigl 2009. L'entrada en vigur è previsa per il 1. d'avust 2009. Ils documents da consultaziun pon vegnir consultads sin la pagina d'internet da l'uffizi d'energia e da traffic www.aev.gr.ch.

Infurmaziuns:
- president da la regenza Stefan Engler, schef dal departament da construcziun, traffic e selvicultura, tel. 081 257 36 01
- Ernst Bachmann, manader da l'uffizi d'energia e da traffic, tel. 081 257 36 21

La regenza refusa decididamain il conclus federal davart la rait da vias naziunalas
La regenza grischuna refusa decididamain l'adattaziun dal conclus federal davart la rait da vias naziunalas che vegn preschentada en il sboz da la procedura da consultaziun. Sut las cundiziuns generalas ch'èn avant maun na po ella betg ir d'accord cun il fatg che la via dal Güglia vegn integrada da nov en la rait da vias naziunalas.
En sia resposta da consultaziun sustegna la regenza las posiziuns da la conferenza svizra da las directuras e dals directurs da construcziun, da planisaziun e da protecziun da l'ambient (CCPA) sco er da la conferenza da las directuras e dals directurs chantunals da finanzas (CDF). Cunzunt la repartiziun da las incumbensas e la finanziaziun stattan en cuntradicziun cun ils princips ch'èn vegnids concludids en la nova concepziun da la gulivaziun da finanzas e da la repartiziun da las incumbensas tranter la confederaziun ed ils chantuns (NGF).
La regenza crititgescha ch'ina via chantunala vegn integrada en la rait da vias naziunalas cunter la voluntad dal chantun. Sche la missiva duess vegnir adattada pervia dal resultat da la procedura da consultaziun e sche la finanziaziun duess vegnir midada, giavischa la regenza da pudair prender posiziun in'ulteriura giada. Plinavant pretenda la regenza ch'i stoppia vegnir preschentà avertamain en connex cun l'engrondiment da la rait, tge projects d'amplificaziun che hajan la prioritad e cur ch'i saja previs da realisar quels. Sche la confederaziun avess da sa decider da renunziar a l'engrondiment da la rait, stoppia vegnir mantegnì il status quo er areguard la dimensiun da la rait da vias principalas per betg stuair ristgar ch'i dettia spustaments e dischequilibers tar l'attribuziun dals meds finanzials per las vias principalas.

Infurmaziuns:
- president da la regenza Stefan Engler, schef dal departament da construcziun, traffic e selvicultura, tel. 081 257 36 01

La regenza approvescha la construcziun dal sviament da Glion
La regenza grischuna ha approvà il project per il sviament da Glion. Qua tras duai la citad da Glion vegnir distgargiada dal traffic da transit. Las vias chantunalas per Val S. Pieder, per Sursaissa e per la Lumnezia sco er la lingia da la Viafier retica traversan oz la citad da Glion. Sch'il volumen da traffic è pli grond e sche las barrieras da la viafier èn serradas, chaschuna quai savens colonnas ed impediments da traffic.
Al vest da la citad da Glion, en il sectur da la centrala da la NOK Glion II, collia il nov sviament la via sursilvana H19 cun la via da Lumnezia en il sectur da Muschna. La lunghezza totala dal project importa stgars 700 meters. L'element central dal project da sviament è ina punt d'ina lunghezza da 270 meters che duai traversar il Rain anteriur, la Viafier retica sco er la via Santeri. En la proxima fasa da projectaziun duai la concepziun da la punt survegnir l'attenziun correspundenta. L'onn proxim vegnan elavurads ils projects d'execuziun per ils differents projects parzials, per ch'ins possia cumenzar l'onn 2010 cun las emprimas lavurs da construcziun tenor il program da construcziun da vias 2009-2012. I vegn fatg quint cun custs totals da 18.4 milliuns francs.

Da vischnancas e da regiuns
Sent: La revisiun parziala da la constituziun communala, concludida a chaschun da la radunanza communala dals 26 d'avust 2008, vegn approvada.

Projects da vias
La regenza ha approvà totalmain 450'000 francs per construir e per sanar ils suandants trajects da vias:
- via dal Partenz: lavurs d'impressari e da cuvrida, colliaziun da Jenaz

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun