En l'avegnir duain vegnir dismess tut ils ruments chasans combustibels dal Grischun - sche pussaivel - en il stabiliment per arder ruments (SAR) a Trimmis. Excepziuns per cas che pon vegnir motivads cun criteris ecologics ed economics èn dentant pussaivlas. La regenza grischuna ha deliberà la missiva correspundenta tar la revisiun parziala da la lescha chantunala davart la protecziun da l'ambient per mauns dal cussegl grond. Il parlament vegn a tractar quest project en la sessiun da december.
La finamira principala da questa revisiun parziala da la lescha davart la protecziun da l'ambient è quella da determinar l'entir chantun sco intschess per ruments chasans combustibels che vegnan surpigliads dal SAR a Trimmis. Tut las corporaziuns per la gestiun da ruments dal chantun vegnan uschia obligadas tenor la lescha da consegnar ils ruments chasans combustibels al SAR a Trimmis. Cun quai duai vegnir cuntanschì ch'i dettia en l'avegnir uschè paucs transports da rument sco pussaivel e che las capacitads dad arder existentas en il SAR a Trimmis vegnian tratgas a niz en moda raschunaivla. Cun la capacitad da combustiun actuala da 95'000 tonnas per onn pon vegnir dismess a Trimmis - tenor la planisaziun chantunala dals ruments - tut ils ruments chasans combustibels che resultan en il Grischun fin l'onn 2020. A medem temp po l'utilisaziun da la chalur da combustiun per vapur d'industria e per chalur a distanza sco er per la producziun d'energia electrica vegnir amplifitgada e meglierada.
La revisiun parziala da la lescha davart la protecziun da l'ambient prevesa che la regenza possia permetter excepziuns ed admetter la dismessa en stabiliments extrachantunals. La premissa è dentant che la dismessa dals ruments daventia uschia bler pli favuraivla e ch'il transport, dentant er che la dismessa hajan avantatgs ecologics. Ultra da quai prevesa la revisiun parziala da la lescha davart la protecziun da l'ambient ch'i valian - sa basond sin prescripziuns adattadas - ils medems pretschs da combustiun per tut las otg corporaziuns per la gestiun da ruments dal Grischun. La finala duai vegnir introducida in'obligaziun da dumandar ina permissiun per surpigliar ruments d'ordaifer il chantun.
Ils contracts existents da corporaziuns per la gestiun da ruments che concernan la dismessa en stabiliments extrachantunals e ch'èn vegnids fatgs avant il 1. da schaner 2007 restan intacts. Els na dastgan dentant betg vegnir prolungads sur la durada fixada. Sin fundament da contracts vegnan ils ruments chasans combustibels da l'Engiadin'ota, dal Puschlav sco er da la Surselva dismess actualmain en il SAR da la cuntrada da la Linth a Niederurnen e quels da la Val Müstair en il SAR da Horgen.

Gremi: regenza
Funtauna: rg chanzlia chantunala dal Grischun