La "giunta provinciale di Sondrio" visita mardi, ils 7 d'october 2008, il Grischun. La scuntrada cun la regenza grischuna ha lieu a Puschlav. A la testa da la delegaziun da noss pajais vischin stat il president Fiorello Provera. Ils giasts vegnan retschavids dal president da la regenza Stefan Engler e da l'entira regenza. Suenter il bainvegni a Puschlav èsi previs da visitar il center da commerzi d'electricitad da la Rezia energia. La scuntrada da las regenzas vegn terminada cun ina tschaina communabla.
La regenza tgira mintga onn contacts cun represchentantas e cun represchentants da stadis esters en Svizra u cun regenzas da pajais vischins. Quests discurs èn elements impurtants da las relaziuns externas dal chantun. En connex cun ils stadis vischins e cun pajais che han relaziuns spezialas cun la Svizra e cun il Grischun vegnan savens discutadas dumondas materialas actualas. Autras visitas servan en emprima lingia al barat d'experientschas sin il champ cultural, economic e politic.

Infurmaziun per las medias:
A las 16.00 po vegnir fatga ina fotografia communabla da las duas delegaziuns tar la Rezia energia (via da Clalt 307) a Puschlav.

Gremi: chanzlia chantunala dal Grischun
Funtauna: rg chanzlia chantunala dal Grischun