La regenza grischuna ha elegì - en ina emprima purziun - trais projects innovativs per novas colliaziuns da traffic, ils quals pon vegnir elavurads vinavant. Il medem mument ha ella dà l'incumbensa da concretisar vinavant quests projects en il rom da studis areguard l'opportunitad respectivamain la realisabladad. En quest connex sa tracti dal project dal traject da la viafier retica (VR) Landquart - Claustra (- Tavau), dal project d'avertura da Lai e dal project "tren dal futur Turitg - Cuira".
Il project dal traject da la VR Landquart - Claustra (-Tavau) ha la finamira d'accelerar il tempo e d'augmentar la prestaziun sin il traject respectiv. Grazia a novs trajects a dus binaris duain la stabilitad da l'urari e la capacitad dal traject vegnir augmentadas ed il temp da viadi tranter Lanquart e Tavau duai vegnir scursanì sin main che in'ura. Tar il concept d'avertura da Lai duain - en il rom d'in studi da realisabladad e da rentabilitad - vegnir mussadas eventualas variantas per ina nova avertura Cuira - Lai. Quellas duain contribuir a distgargiar la via existenta ed uschia a schliar ils problems da traffic actuals en l'aglomeraziun da Cuira, en il conturn da Lai e sin l'axa da colliaziun correspundenta. Il terz project ch'è vegnì elegì, il project "tren dal futur Turitg - Cuira" duai mussar las pussaivladads per optimar il traject Cuira - Turitg da las viafiers federalas svizras (VFF). La finamira è da meglierar la colliaziun cun la rait da viafier naziunala respectivamain internaziunala en il vast territori da Turitg.
Il zercladur 2006 aveva il cussegl grond definì l'utilisaziun dal retgav finanzial extraordinari da la banca chantunala grischuna. Tranter auter èn vegnids reservads 10 milliuns francs per la planisaziun da novas colliaziuns innovativas en il Grischun ed en il territori alpin che cunfinescha cun il Grischun.

Nagins projects chantunals da votaziun il 1. da zercladur 2008
La regenza ha prendì per enconuschientscha che la dumengia, il 1. da zercladur 2008 vegnan suttamess a la votaziun dal pievel sco projects federals l'iniziativa dal pievel dals 18 da november 2005 "per natiralisaziuns democraticas", l'iniziativa dal pievel dals 11 d'avust 2004 "Suveranitad dal pievel senza propaganda da las autoritads" sco er l'artitgel constituziunal dals 21 da december 2007 "per qualitad ed economisaziun en l'assicuranza da malsauns" (cuntraproject tar l'iniziativa dal pievel "per premias da la cassa da malsauns pli bassas en l'assicuranza fundamentala" ch'è vegnida retratga). A questas votaziuns na vegnan suttamess nagins projects chantunals.

Da vischnancas e da regiuns
- Nufenen: A la vischnanca da Nufenen vegn garantida ina contribuziun da 28'616 francs per la renovaziun e per l'engrondiment dal provediment d'aua e d'electricitad da l'etappa 2008, chascharia - "Stutzli".
- Riom-Parsonz: Il project per la dustanza "Ual da Bartanga" ed "Ual da la Motta" sin il territori da la vischnanca da Riom-Parsonz vegn approvà. I vegn concedida ina contribuziun chantunala als custs da maximalmain 300'000 francs .
- Fanas, Grüsch, Seewis e Valzeina: Il statut d'organisaziun dal "consorzi da scola Fanas, Grüsch, Seewis e Valzeina" vegn approvà.
- Haldenstein: La revisiun parziala da la planisaziun locala "Batänja/Herenberg" da la vischnanca da Haldenstein dals 24 da november 2006 vegn approvada.
- Müstair: La revisiun parziala da la planisaziun locala da la vischnanca da Müstair dals 31 da matg 2006 vegn approvada cun intginas correcturas.
- Savognin: La revisiun parziala da la planisaziun locala en la zona da mastergn maschadada "Bursa" da la vischnanca da Savognin dals 3 da december 2007 vegn approvada.
- Trun: La revisiun parziala da la planisaziun locala da la vischnanca da Trun dals 5 da december 2007 vegn approvada.
- Corvatasch SA: En sia consultaziun a l'uffizi federal da traffic davart la dumonda da concessiun e d'approvaziun dal plan da la Corvatsch SA dal december 2007 per la construcziun d'ina sutgera da dus cun cludigls fixs "Rabgiusa-Curtinella" sin il territori da la vischnanca da Segl e da Silvaplauna propona la regenza da dar la concessiun.

Contribuziuns chantunalas a differentas instituziuns
- "Bündner Monatsblatt" e "Quaderni grigionitaliani": L'ediziun da numers spezials dal "Bündner Monatsblatt" e dals "Quaderni grigionitaliani", che s'occupan da l'architect Bruno Giacometti e da sia ovra, vegn sustegnida cun ina contribuziun da 12'000 francs.

Projects da vias
La regenza ha approvà totalmain 12'347'000 francs per construir e per sanar ils suandants trajects da vias:
- via naziunala A28: lavurs d'impressari per il sviament da Küblis
- via da la Mantogna dadens: lavurs da cuvrida Foppa - Cons
- via taliana: lavurs d'impressari per la punt a spunda en la Viamala
- via dal Güglia: lavurs da cuvrida e correcziuns da la via Tges Alva - Bivio; lavurs d'impressari e preparaziun da material "Mot - Sur Gonda"; lavurs d'impressari tumbin Suraqua
- via sursilvana: lavurs da cuvrida Laax - Glion; lavurs da cuvrida Tavanasa - Lumneins; lavurs da cuvrida Caltgeras - Schlans
- via dal pass dal Fuorn: lavurs da construcziun e da cuvrida dals mirs da sustegn sin la via dal pass dal Fuorn
- via da Riein: lavurs da cuvrida Sevgein - Riein
- via da Val S. Pieder: lavurs da cuvrida Glion - Uors

Gremi: regenza
Funtauna: rg chanzlia chantunala dal Grischun