En sia sesida dad oz ha la regenza concludì da sa participar a la maisa radunda davart il lavuratori da las viafiers federalas a Bellinzona. Questa maisa radunda era vegnida convocada dal cusseglier federal Moritz Leuenberger e vegn manada da l'anteriur cusseglier naziunal Franz Steinegger. La regenza è sa decidida da sa participar a la maisa radunda, perquai ch'il chantun Grischun fiss pertutgà fermamain, sch'il lavuratori da las viafiers federalas a Bellinzona vegniss serrà. Numerusas collavuraturas e numerus collavuraturs dal lavuratori a Bellinzona abitan en il Moesano, pia en il Grischun. Per la regenza sa tracti cunzunt da dar ina perspectiva per il futur tant a questas collavuraturas ed a quests collavuraturs sco er ad ulteriuras collavuraturas ed ad ulteriurs collavuraturs dal lavuratori da las viafiers federalas a Bellinzona. Ina tala perspectiva per il futur è tant pli impurtanta, perquai che l'ovra a Bellinzona garantescha plazzas da lavur en territoris cun structuras deblas. La garanzia da plazzas da lavur ha l'emprima prioritad per la regenza grischuna. En ina brev al manader da la maisa radunda exprima la regenza plinavant cleras imaginaziuns davart la finamira e davart la realisaziun da las tractativas. Per la regenza grischuna dovri cleras reglas da gieu, sche la maisa radunda duai avair success. A l'emprima sesida da la maisa radunda che ha lieu ils 14 da matg 2008 sa participeschan - sco represchentants da la regenza grischuna - il president da la regenza Stefan Engler ed il cusseglier guvernativ Hansjörg Trachsel.

Gremi: regenza
Funtauna: rg chanzlia chantunala dal Grischun