Il referendum cunter il conclus dal cussegl grond davart la nova concepziun da la gulivaziun da finanzas e da la repartiziun da las incumbensas tranter il chantun e las vischnancas (NGF grischuna) dals 15 da zercladur 2009 è reussì cun 6'460 suttascripziuns valaivlas. Perquai ch'i dat anc recurs pendents tar la dretgira administrativa, na po la votaziun betg avair lieu sco previs ils 29 da november 2009. La regenza vegn a fixar pli tard il termin per la votaziun dal pievel davart quest project.
La chanzlia chantunala ha verifitgà las suttascripziuns inoltradas sin las glistas da suttascripziuns attestadas; resultada è ina pitschna differenza cun las indicaziuns dal comité da referendum.
 
Nagins projects chantunals da votaziun ils 29 da november 2009
La regenza grischuna ha prendì enconuschientscha dal fatg ch'il conclus federal dals 3 d'october 2008 davart la creaziun d'ina finanziaziun speziala per incumbensas en il sectur dal traffic aviatic, che l'iniziativa dal pievel dals 21 da settember 2007 "per in scumond d'exportar material da guerra" sco er che l'iniziativa dal pievel dals 8 da fanadur 2008 "cunter la construcziun da minarets" vegnan suttamess sco projects federals a la votaziun dal pievel da dumengia, ils 29 da november 2009. A questa votaziun na vegnan suttamess nagins projects chantunals.

Gremi: regenza
Funtauna: rg chanzlia chantunala dal Grischun