La revisiun totala da la lescha da victualias è sa fermada a mesa strada
En sia resposta da consultaziun a la confederaziun davart la revisiun totala da la lescha da victualias beneventa la regenza grischuna cunzunt l'assimilaziun da las prescripziuns tecnicas en il sectur da la segirezza da victualias a quellas da la UE. Quai facilitescha il commerzi cun la UE ed è er raschunaivel or da l'optica da la protecziun da la consumenta e dal consument. La regenza menziunescha plinavant che la revisiun totala saja sa fermada a mesa strada. Sco en la UE duajan vegnir resguardads tut ils aspects da la segirezza da victualias en la nova lescha da victualias. Latiers tutga l'integraziun da las pretensiuns a la producziun primara ed al pavel sco er da las pretensiuns areguard la sanadad d'animals, areguard la protecziun dals animals ed areguard la sanadad da las plantas. L'unificaziun da las legislaziuns sco er l'examinaziun da las structuras e da las cumpetenzas en il sectur da la controlla da las victualias sin stgalim federal èn impurtantas premissas per in'execuziun effizienta en ils chantuns.

La 6avla revisiun da la AI planisada vegn crititgada
La regenza grischuna n'è betg cuntenta cun il sboz preliminar da l'emprim pachet da mesiras da la 6avla revisiun da la lescha federala davart l'assicuranza d'invaliditad (AI). Ina finamira principala dal project, numnadamain quella da meglierar l'integraziun professiunala da persunas cun impediments, vegn sustegnida expressivamain da la regenza.
En sia resposta da consultaziun crititgescha ella dentant che la basa da decisiun na saja betg preschentada en moda suffizienta e che las consequenzas da las mesiras per ils chantuns e per la segirezza sociala futura sajan descrittas en moda incumpletta. Plinavant crititgescha ella che pliras dumondas impurtantas na vegnian betg respundidas. Ultra da quai na vegnan betg resguardadas las consequenzas da la 5avla revisiun da la AI. Areguard la contribuziun d'assistenza beneventa la regenza da princip la finamira "ambulant avant staziunar" sco er las mesiras per augmentar l'autodeterminaziun da persunas cun impediments. Il concept per promover tractaments ambulants cun agid d'ina contribuziun d'assistenza empè da la collocaziun en ina chasa correspunda a la finamira strategica dal chantun Grischun en dumondas che concernan persunas cun impediments. La finanziaziun da la contribuziun d'assistenza ch'è planisada vegn dentant refusada cun l'argument che l'introducziun d'ina tala tenor las prescripziuns dal cussegl federal na dastgia betg chaschunar novs custs tant betg per la confederaziun sco er betg per ils chantuns.

Dapli contribuziuns federalas per projects da biodiversitad
Per projects en il sectur da la biodiversitad duai il chantun Grischun survegnir dapli contribuziuns federalas. La regenza grischuna ha approvà las cumplettaziuns correspundentas da las cunvegnas da program tenor la NGF cun l'uffizi federal d'ambient en ils secturs "natira e cuntrada (LNP)" sco er "biodiversitad en il guaud".
Il parlament federal aveva concludì ils 11 da mars 2009 d'investir supplementarmain durant l'onn current tut en tut 24 milliuns francs en la biodiversitad. La cunvegna da program cumplettada cuntegna en il sectur "natira e cuntrada (LNP)" projects cun custs totals da 3.59 milliuns francs per ils proxims trais onns en il chantun Grischun. La confederaziun sa participescha cun 1.64 milliuns francs vi da quests projects. Per il chantun resultan custs dad 1.95 milliuns francs. Per projects en il sectur "biodiversitad en il guaud" èn previsas contribuziuns federalas supplementaras da 0.4 milliuns francs.

Da vischnancas e da regiuns

• Cauco: La revisiun totala da la planisaziun locala da la vischnanca da Cauco dals 13 d'avrigl 2008 vegn approvada.
• Mantogna/Tumleastga: La regenza ha approvà la revisiun parziala dals statuts dal consorzi da scola da Mantogna/Tumleastga. Els entran en vigur retroactivamain per l'onn da scola 2008/2009.
• Sursaissa Mundaun: Ils statuts dals pumpiers da Sursaissa Mundaun vegnan approvads cun in'excepziun. Els entran en vigur retroactivamain per il 1. da schaner 2009.
• Ramosch: Il project per la renovaziun e per l'engrondiment dal provediment d'aua dals territoris d'abitadi da Ramosch e da Vnà vegn approvà e sustegnì cun ina contribuziun maximala dad 1'061'000 francs.
• Schiers: La revisiun parziala da la planisaziun locala dals 8 da matg 2009 vegn approvada.
• Zernez: La revisiun parziala da la planisaziun locala Ruzön dals 26 da zercladur 2009 vegn approvada.
• Diversas: La regenza approvescha il contract tranter il chantun Grischun e las vischnancas d'Ardez, da Ftan, da Scuol, da Sent e da Tarasp concernent la surpigliada d'incumbensas da la polizia communala tras la polizia chantunala dal Grischun

Contribuziuns chantunalas a differentas instituziuns

• alpFUTUR: A la staziun da perscrutaziun Agroscope Reckenholz-Tänikon ART a Turitg ed a l'institut federal per la perscrutaziun WSL a Birmensdorf vegn concedida ina contribuziun da 100'000 francs per il project alpFUTUR per ils onns 2009 fin 2012.
• karch: Al center da coordinaziun per la protecziun dals amfibis e dals reptils en Svizra (karch) vegn concedida ina contribuziun da 55'000 francs per ils onns 2009 fin 2011.

Projects da vias
La regenza ha approvà totalmain 1'600'000 francs per construir e per sanar il suandant traject da via:
- via da la Tumleastga: lavurs d'impressari, Sched - Veulden

Gremi: regenza
Funtauna: rg chanzlia chantunala dal Grischun