Suenter in temp da renovaziun da 7 mais è la sanaziun da la fatschada da la chasa grischa terminada. L'edifizi da 250 onns sa preschenta puspè en nova splendur.

L'edifizi "Neues Gebäu" è vegnì construì ils onns 1751/52 per incumbensa dal colonel Andreas da Salis-Soglio. Las lavurs da construcziun èn vegnidas exequidas da l'impressari Johannes Grubenmann da Teufen (AR) en in stil sever baroc cun ina construcziun pompusa a l'interiur. Dapi la suttascripziun da l'acta da mediaziun l'onn 1803 tras Napoleon Bonaparte serva l'edifizi sco chasa represchentativa da la regenza, enconuschenta sco chasa grischa. Circa mintga 50 onns è la chasa puspè vegnida renovada e sanada. L'ultima renovaziun exteriura cumplessiva ha gì lieu l'onn 1965.

La sanaziun ch'è vegnida fatga ussa ha gì la finamira da mantegnair la substanza da tut ils mirs exteriurs. Suenter avair remplazzà tut las fanestras èn vegnids renovads ultra da la liadira da la fatschada e da las lavurs da crappa natirala er il tetg e las spundas dals balcuns. Per meglierar il clima a l'interiur èn vegnids montads parasulegls discrets vi da tut las fanestras a la fatschada dal sid. Il concept da sanaziun è vegnì sviluppà da l'uffizi da construcziun auta en stretga collavuraziun cun la tgira da monuments sco er cun spezialistas e cun spezialists cumprovads. Las lavurs èn vegnidas realisadas en moda professiunala d'auta qualitad d'interpresas grischunas. Sche l'aura permetta quai, vegn er terminà anc quest onn il sectur dal fundament. Ils custs importan var 900'000 francs.

Infurmaziuns:
- Stefan Engler, cusseglier guvernativ, schef dal DCTS, tel. 081 257 36 01
- Markus Dünner, architect chantunal, uffizi da construcziun auta, tel. 081 257 36 31

Gremi: uffizi da construcziun auta
Funtauna: rg uffizi da construcziun auta