Suenter la fusiun d'unitads administrativas ch'è vegnida realisada per part en las regiuns duai avair lieu ina concentraziun er a Cuira. Ils passa 40 lieus administrativs repartids sin l'entir territori da la citad demussan il potenzial d'optimaziun il pli grond. La regenza grischuna recumonda perquai al cussegl grond da reunir la gronda part da l'administraziun chantunala ch'è activa a Cuira en in edifizi nov che vegniss construì sin l'anteriur areal da la caserna. La regenza ha deliberà la missiva correspundenta davart la strategia d'immobiglias dal chantun - realisaziun da la strategia a Cuira.

La strategia d'immobiglias dal chantun ha la finamira d'optimar il portfolio da las immobiglias e dal basegn da surfatscha, particularmain cun concentrar singulas unitads administrativas en centers regiunals. La finala duai er vegnir realisada la finamira da sbassar ils custs da las localitads en moda persistenta. Differentas mesiras servan a sminuir las surfatschas, a reducir il consum d'energia, a meglierar la collavuraziun entaifer l'administraziun, a flexibilisar l'adempliment da las incumbensas e pia a laschar profitar pli fitg la clientella.
Il project "sinergia" permetta al chantun da reunir ina gronda part da l'administraziun ch'è actualmain sparpagliada sin l'entir territori da la citad en in edifizi administrativ che duai vegnir construì da nov. Quel vegn a cuntegnair circa 725 plazzas da lavur e vegn a sa chattar sin l'areal da la caserna sper la polizia chantunala e sper l'uffizi per il traffic sin via. Las immobiglias che appartegnan al chantun e che na vegnan betg pli duvradas vegnissan vendidas ina pau a la giada e las ulteriuras relaziuns da locaziun vegnissan annulladas successivamain. Tar ina investiziun netta da circa 50 milliuns francs fa la regenza quint ch'i resultan - ultra d'avantatgs da manaschi - respargns annuals dad 1,8 fin 2,2 milliuns francs.
Sco alternativa mussa ina segunda varianta ch'i fiss pussibel da realisar la strategia en pass modulars, structurads tenor prioritads. Cun questa moda da proceder pudessan las finamiras immobigliaras ch'ins vul cuntanscher vegnir ademplidas dal tuttafatg il pli baud pir en 15 onns, dentant pajond in pretsch cumplessiv che fiss considerablamain pli aut. En ina terza varianta vegnan la finala preschentadas soluziuns per optimar il manaschi da l'administraziun cun concentrar singulas unitads en agens edifizis ed en edifizis prendids en locaziun e cun meglierar ils edifizis respectivs dal punct da vista energetic. Ma il grond dumber da lieus administrativs pudess vegnir reducì mo moderadamain e la finamira da sminuir marcantamain la surfatscha, en cumbinaziun cun in respargn correspundent dals custs, na vegniss betg cuntanschida cun questa varianta.

La regenza vul progredir cun il project "sinergia"
La regenza è persvadida dals avantatgs dal project "sinergia" ed ha l'intenziun da far progredir sia realisaziun. Sch'il cussegl grond vegn a prender ina decisiun positiva per la varianta "sinergia" en la proxima sessiun da december, permetta quai da publitgar, sco proxim pass, ina concurrenza da planisaziun. Il nov edifizi administrativ fiss pront il pli baud la fin da l'onn 2014. La decisiun da princip davart l'ulteriur proceder è uss dentant chaussa dal cussegl grond.

Infurmaziuns:
- cusseglier guvernativ Stefan Engler, schef dal departament da construcziun, traffic e selvicultura, tel. 081 257 36 01
- Markus Dünner, architect chantunal, uffizi da construcziun auta, tel. 081 257 36 31

Gremi: regenza
Funtauna: rg chanzlia chantunala dal Grischun