Il center da furmaziun e cussegliaziun agricula Plantahof a Landquart survegn in nov auditori. Glindesdi, ils 19 d'october 2009, è vegnida fatga l'emprima badigliada. Suenter in temp da planisaziun da bunamain in onn pon ins cumenzar cun la construcziun.

Il center da furmaziun e cussegliaziun agricula Plantahof (CFCA) è dapi passa 100 onns en possess dal chantun e vegn manà oz sco manaschi certifitgà (ISO 9001) cun ina incarica da prestaziun e cun in preventiv global. Sia reputaziun tanscha lunsch sur il cunfin dal chantun ora. Per restar in center da scolaziun dominant ed attractiv e per pudair dumagnar l'affluenza creschenta da clientas e da clients han ins prendì en mira l'onn 2005 da construir in auditori. L'auditori duai en emprima lingia servir a la furmaziun supplementara ed a la transmissiun d'infurmaziuns per las famiglias da purs activas en il Grischun ed en ils chantuns vischins. Senza questa nova infrastructura na fiss il Plantahof strusch abel d'ademplir sia incumbensa impurtanta.
L'atun 2008 ha l'uffizi da construcziun auta dal Grischun organisà ina concurrenza da projects tranter otg biros d'architectura grischuns enconuschents. La giuria ha recumandà unanimamain als patruns da construcziun da realisar il project cuminaivel da Valerio Olgiati e da Georg Nikisch / Selina Walder, Flem. Il team incumbensà ha perfecziunà il sboz da la concurrenza da projects, e quai en collavuraziun cun l'uffizi da construcziun auta e cun represchentants dal Plantahof, e l'ha terminà en ina furma ch'è pronta per vegnir realisada. Il nov auditori permetta in'utilisaziun multifuncziunala per in dumber da visitadras e da visitaders da 130 fin maximalmain 180. La furma lunghenta è adattada – cumplementarmain a l'utilisaziun classica da l'auditori – er per differentas autras utilisaziuns sco seminaris, dietas e discussiuns al podium.
Ils custs vegnan calculads cun 2.75 milliuns francs. Grazia ad ina donaziun generusa d'ina fundaziun privata da 2 milliuns francs, sto il chantun anc surpigliar custs da 0.75 milliuns francs.
Pervia d'ina procedura da recurs en connex cun la surdada da las lavurs d'impressari vegni cumenzà a construir cun in retard da prest dus mais. L'inauguraziun dal nov auditori è previsa per l'atun 2010.

Infurmaziuns:
Markus Dünner, architect chantunal, uffizi da construcziun auta, tel. 081 257 36 31

Gremi: uffizi da construcziun auta
Funtauna: rg uffizi da construcziun auta