A chaschun da sia ultima sesida ha la regenza grischuna concludì ina revisiun parziala da las disposiziuns executivas tar la lescha da meglieraziun. En l'avegnir duain uschia pudair vegnir reparads pli svelt donns da malaura en il territori rural. Plinavant ha la regenza tractà ina consultaziun a la confederaziun tar la nova norma penala ch'è planisada en cas ch'i vegnan duvrads simbols rassistics.

Donns da malaura en il territori rural duain pudair vegnir reparads pli svelt en l'avegnir
En il rom da mesiras da meglieraziun duain donns da malaura ordaifer las zonas da construcziun pudair vegnir reparads pli svelt en l'avegnir. Da nov pon las autoritads chantunalas permetter in cumenzament anticipà da la construcziun, sche la decisiun davart la concessiun da contribuziuns per reparar donns da malaura na po excepziunalmain betg vegnir prendida ordavant. La regenza grischuna ha approvà la revisiun parziala correspundenta da las disposiziuns executivas tar la lescha da meglieraziun dal chantun Grischun e l'ha messa en vigur per il 1. da november 2009.
En connex cun la reparaziun da donns da malaura ston er en il territori rural ordaifer las zonas da construcziun vegnir fatgs differents scleriments e prendidas bleras mesiras entaifer in curt temp. La finamira è quella da restabilir las infrastructuras minimalas, sco per exempel l'access a bains purils, uschè svelt sco pussaivel. Quai gida ad evitar donns consecutivs ed a minimar la perdita da rendita dals manaschis agriculs. En quests cas che basegnan mesiras urgentas da meglieraziun na stoi betg pli vegnir spetgà cun las lavurs d'execuziun en l'avegnir, fin ch'ils posts cumpetents han decidì davart dumondas da contribuziun.

La nova norma penala en connex cun simbols rassistics vegn beneventada
La confederaziun vul cumplettar il cudesch penal svizzer e la lescha penala militara cun novas disposiziuns, tenor las qualas il diever public, la derasaziun, la producziun, il deposit sco er l'import e l'export da simbols rassistics vegnan chastiads. Sco quai ch'ella menziunescha en sia resposta da consultaziun a la confederaziun, beneventa la regenza grischuna da princip questa soluziun unitara svizra.
Quals simbols rassistics ch'èn relevants per il dretg penal, pon – cun la soluziun tschernida – decider las autoritads da persecuziun penala. Perquai è la regenza da l'avis, che la confederaziun stoppia – per pudair applitgar questa soluziun en moda giuridicamain eguala – rimnar ils fatgs ch'èn vegnids giuditgads cun vigur legala e manar in register per ils chantuns.

Da vischnancas e da regiuns

• Moesa: La regenza ha approvà il contract tranter la Corporazione dei Comuni del Moesano per la raccolta e l'eliminazione dei rifiuti (CRER) e la Azienda cantonale dei rifiuti del Canton Ticino (ACR) per dismetter ruments combustibels da la CRER fin a la fin da l'onn 2019 en il stabiliment d'utilisaziun termica a Giubiasco en il Tessin.
• Cauco: A la vischnanca da Cauco vegn concedida ina contribuziun da 480'000 francs per revitalisar la Calancasca en il territori da Pian de Alne.
• Mesauc: La revisiun parziala da la planisaziun locala da la vischnanca da Mesauc dals 24 da zercladur 2009 vegn approvada.
• Sumvitg: La revisiun parziala da la planisaziun locala da la vischnanca da Sumvitg, ch'era vegnida concludida ils 2 da zercladur 2009, vegn approvada.
• Ftan: En sia consultaziun a l'uffizi federal da traffic areguard la dumonda da las pendicularas Motta Naluns Scuol-Ftan-Sent SA dals 6 da fanadur 2009 da dar la concessiun tenor il dretg davart las telefericas e d'approvar ils plans per construir e per manar ina sutgera da quatter da Ftan a Prui, propona la regenza da dar la concessiun.

Contribuziuns chantunalas a differentas instituziuns

• Tgira da monuments: Per restaurar il tetg e las fanestras da la chasa d'abitar Villa Segantini a Stampa, Malögia, vegn pajada ina contribuziun maximala da 66'200 francs.

Gremi: regenza
Funtauna: rg chanzlia chantunala dal Grischun