Perquai ch'igl ha er quest onn anc adina bleras novas dumondas d'asil, prenda la regenza ulteriuras mesiras per collocar requirentas e requirents d'asil. Per quest intent acquista il chantun ina immobiglia a Riòlta sut, vischnanca da Cazas. Ultra da quai prenda il chantun en locaziun ina immobiglia a Tavau Laret. Quella serva per entant mo sco reserva e duai remplazzar a vista mesauna l'alloschi "Schiabach" en il center da Tavau.

Il dumber da novas dumondas d'asil è anc adina grond. Al chantun vegnan attribuidas annualmain 450 fin 500 persunas cun l'incumbensa da las collocar ed assister. En consequenza da la situaziun economica e da la reducziun da las pussaivladads d'occupaziun chattan ultra da quai damain requirentas e requirents d'asil la via en il martgà da lavur ed en l'independenza economica. Uschia crescha il basegn d'ulteriuras plazzas da collocaziun. Per collocar questas persunas ha il chantun procurà ussa per novs alloschis.

Il chantun Grischun ha l'intenziun da collocar er en l'avegnir sez las requirentas ed ils requirents d'asil e da betg surdar questa incumbensa a las vischnancas. Quai per distgargiar las vischnancas dad expensas persunalas e finanzialas considerablas. Cun quest proceder arriva la regenza dal rest da mantegnair ina relaziun pli equilibrada tranter ils alloschis collectivs prendids en locaziun ed ils agens alloschis collectivs.

Alloschi collectiv "Rheinkrone" a Cazas
Il chantun Grischun ha acquistà l'hotel/restaurant "Rheinkrone" a Cazas. En quest alloschi pon vegnir collocadas 60 fin 80 persunas. La "Rheinkrone" vegn retratga successivamain en il decurs da l'onn proxim.

La cumpra da l'immobiglia sto anc vegnir approvada dal cussegl grond ed è suttamessa al referendum da finanzas facultativ. La regenza vegn a preschentar al cussegl grond ina missiva correspundenta. Las autoritads da la vischnanca da Cazas èn vegnidas infurmadas per l'emprima giada davart il project la gievgia sera, ils 29 d'october 2009.

Tras l'acquist da la "Rheinkrone" s'augmenta la quota da plazzas en agens alloschis collectivs sin var 140 letgs; quai correspunda ad ina quota da circa 25% dal basegn total d'alloschis collectivs.

Il "Landhaus" a Tavau Laret sco reserva
Ultra da l'acquist a Cazas ha il chantun prendì en locaziun sco reserva l'hotel/restaurant "Landhaus" a Tavau Laret. Qua tras duain vegnir dumagnadas variaziuns extraordinarias dal dumber da requirentas e da requirents d'asil che vegnan attribuids al chantun. Quai per evitar collocaziuns d'urgenza en implants da protecziun civila en las vischnancas. L'alloschi vegn occupà pir e mo uschè ditg, sco quai che tut ils ulteriurs alloschis collectivs en il chantun èn occupads cumplettamain pervia d'in eventual grond augment da novas dumondas d'asil. I n'è betg previs d'utilisar a lunga vista a medem temp il "Schiabach" a Tavau ed il "Landhaus" a Tavau Laret. Sch'i n'èn betg avant maun situaziuns extraordinarias, na duain perquai er en l'avegnir betg vegnir collocadas en la vischnanca da Tavau dapli che 100 fin 120 persunas dal sectur d'asil.

Suenter la fin da la relaziun da locaziun dal "Schiabach" a Tavau èsi previs da duvrar il "Landhaus" sco center transitoric permanent. Uschia pudess vegnir realisà il giavisch da differents circuls da la populaziun da Tavau, numnadamain da transferir l'alloschi d'asil en la periferia. Per finanziar ina tala reserva strategica da collocaziun paja la confederaziun als chantuns ina summa annuala. Uscheditg ch'il chantun n'occupa betg l'alloschi da reserva prendì en locaziun, metta el a disposiziun quel er per auters intents dal maun public a curta vista (p.ex. WEF, polizia). Las autoritads da la vischnanca da Tavau èn vegnidas infurmadas per l'emprima giada davart las midadas la mesemna sera, ils 28 d'october 2009.


Infurmaziuns:
- cussegliera guvernativa Barbara Janom Steiner, scheffa dal departament da giustia, segirezza e sanadad, tel. 081 257 25 01
- Heinz Brand, schef da l'uffizi da fatgs da polizia e da dretg civil, tel. 081 257 25 21


Gremi: departament da giustia, segirezza e sanadad
Funtauna: rg departament da giustia, segirezza e sanadad