La cumissiun predeliberanta dal cussegl grond s'exprima a favur da la fusiun da las vischnancas da Cazas, da Purtagn, da Preaz, da Sarn e da Tartar a la vischnanca da Cazas.

En la sessiun da december 2009 vegn il cussegl grond a sa fatschentar cun la fusiun da las vischnancas da Cazas, da Purtagn, da Preaz, da Sarn e da Tartar a la vischnanca da Cazas. En sia missiva propona la regenza al cussegl grond da metter en vigur la fusiun per il 1. da schaner 2010.

Suenter che las votantas ed ils votants da las vischnancas pertutgadas avevan approvà la fusiun ils 16 da zercladur 2009, ha ussa la cumissiun predeliberanta dal cussegl grond – sut il presidi da la deputada Claudia Kleis-Kümin ed en preschientscha dal cusseglier guvernativ Martin Schmid, dals presidents communals da las vischnancas pertutgadas e dal president cirquital da Tusaun – predeliberà la fatschenta per mauns dal cussegl grond.

Tras questa fusiun nascha en la Mantogna dador ina suletta vischnanca cun il num Cazas. I sa tracta d'ina fusiun exemplarica da tschintg vischnancas taxadas sco finanzialmain deblas. Perquai na vegn la fusiun messa en dumonda da naginas varts. Correspundentamain ha la cumissiun predeliberanta concludì unanimamain da proponer al cussegl grond d'approvar la fusiun da questas vischnancas.


Infurmaziuns:
presidenta da la cumissiun Claudia Kleis-Kümin, tel. 081 651 43 77


Gremi: cumissiun predeliberanta per la fusiun a la vischnanca da Cazas
Funtauna: rg cumissiun predeliberanta per la fusiun a la vischnanca da Cazas