En il chantun Grischun pon persunas che han ina ristga da cumplicaziun pli gronda sco er il persunal da sanadad sa laschar vaccinar a partir da mez november cunter la grippa pandemica A H1N1 tar ils medis districtuals sco er en ils ambulatoris dals ospitals publics. Circa duas emnas pli tard stat la vaccinaziun a disposiziun a tut la populaziun en tut las praticas da medias e da medis. La vaccinaziun è voluntara e gratuita per tut la populaziun.

Per l'acziun da vaccinar observa il chantun Grischun las recumandaziuns e las directivas da la confederaziun. La regenza grischuna ha approvà il concept correspundent da l'uffizi da sanadad per vaccinar cunter la grippa pandemica A H1N1 en il Grischun. L'acziun da vaccinar cumenza mez november. La data exacta dal cumenzament dependa anc da la data, a la quala la confederaziun furnescha al chantun Grischun ils vaccins ch'èn admess da swissmedic.

L'emprima fasa è per gruppas da ristga
Il cumenzament na vegnan ils vaccins che la confederaziun metta a disposiziun betg a bastar per vaccinar tut la populaziun. Pervia da quai recumondan las autoritads da vaccinar en in'emprima fasa quellas persunas che pudessan avair ina ristga da cumplicaziuns pli gronda, sch'ellas survegnissan la grippa. En questa fasa duain er las persunas che han in stretg contact cun persunas da ristga sco er il persunal dal sectur da sanadad dals ospitals, da la spitex e da praticas da media u da medi sa laschar vaccinar. Concretamain sa tracti da las suandantas gruppas da persunas:
 

1. persunas che lavuran en il sectur da sanadad e che han contact cun pazientas e cun pazients sco er persunas che tgiran poppins sut 6 mais;
2. dunnas en speranza (en spezial a partir da la 14avla emna) e dunnas che han gist parturì;
3. uffants a partir da 6 mais, giuvenils e creschids che han malsognas cronicas dal cor e dals pulmuns (en spezial sbagls dal cor innats, insuffizienza dal cor, asma bronchiala, mucoviscidosa), malsognas metabolicas cronicas (en spezial diabetes tip II), insuffizienza dals gnirunchels, malsognas dal sang u immunosuppressiun;
4. persunas da contact (medema chasada) da gruppas da ristga u da poppins sut sis mais.

 
En il Grischun pon questas gruppas da ristga sa laschar vaccinar en l'emprima fasa en las praticas dals medis districtuals sco er da lur substitutas e da lur substituts sco er en ils ambulatoris dals ospitals publics dal chantun. Latiers tutgan l'ospital chantunal dal Grischun a Cuira, l'ospital da l'Engiadin'ota a Samedan, l'ospital regiunal a Glion, l'ospital a Tavau, l'ospital regiunal a Schiers, l'ospital a Tusaun, l'ospital a Scuol, l'ospital San Sisto a Puschlav, l'ospital da la Bregaglia, l'ospital cirquital a Savognin sco er l'ospital a Val Müstair. La glista dals medis districtuals po vegnir consultada en l'internet tar l'uffizi da sanadad (www.gesundheitsamt.gr.ch).

La segunda fasa è per tut la populaziun
Apaina ch'igl è avant maun vaccin avunda, vegn er purschida la vaccinaziun da las ulteriuras parts da la populaziun sco er dal persunal da sanadad da las chasa da persunas attempadas e da tgira. Quai dastgass esser il cas circa 2 emnas suenter il cumenzament da l'acziun da vaccinar. En questa segunda fasa pon sa laschar vaccinar voluntarmain tut las persunas en il Grischun, e quai en tut las praticas da medias e da medis dal chantun (medias e medis da famiglia, medias e medis d'uffants sco er medias e medis da dunnas).

Ils custs surpiglia il maun public
La vaccinaziun cunter la grippa pandemica A H1N1 è voluntara e gratuita per la populaziun. Ils custs vegnan surpigliads cuminaivlamain da la confederaziun, dals chantuns e da las assicuranzas da malsauns. La confederaziun finanziescha il vaccin ed ils chantuns la vaccinaziun. Sch'i vegnan fatgas circa 40'000 vaccinaziuns en il Grischun, fa il chantun quint cun custs da var 150'000 francs. Sin basa da retschertgas represchentativas da la confederaziun partan las autoritads dal fatg che circa 25 pertschient da la populaziun da la Svizra vegn a sa laschar vaccinar. Per questa acziun da vaccinar po il chantun Grischun sa basar per gronda part sin las structuras existentas dal provediment da sanadad.

Ulteriuras infurmaziuns
Ulteriuras infurmaziuns davart la grippa pandemica e davart l'acziun da vaccinar pon ins chattar sin la pagina d'internet da l'uffizi da sanadad sut www.gesundheitsamt.gr.ch u sut www.pandemia.ch. Là po er vegnir fatg ina pitschna controlla davart il basegn da vaccinar cunter la grippa.


Infurmaziuns:
- cussegliera guvernativa Barbara Janom Steiner, scheffa dal departament da giustia, segirezza e sanadad, tel. 081 257 25 01
- dr. Martin Mani, medi chantunal, tel. 081 257 26 46


Gremi: uffizi da sanadad
Funtauna: rg uffizi da sanadad