La regenza grischuna ha obligà las ovras electricas Mesauc SA (OEM) da meglierar la situaziun da l'aua restanta en la Moesa restituir aua da dotaziun vi da la tschiffada da Curina. Per la pestga en la planira da Pian San Giacomo resulta da quai in augment impurtant da la valur.

Las OEM dispona da concessiuns dal dretg da las auas che la dattan il dretg da duvrar las forzas idraulicas da la Calancasca e da la Moesa sco er da lur affluents en la part sura dal Mesauc per la producziun d'electricitad. Per quest intent ha ella tut en tut diesch lieus per retrair aua. La lescha federala davart la protecziun da las auas oblighescha las societads d'ovras electricas da sanar ils trajects da las auas currentas duvradas, che sa chattan sut la retratga da l'aua, uschenavant che quai po vegnir fatg senza intervenziuns en ils dretgs d'utilisar las auas che giustifitgeschan ina indemnisaziun. Suenter la terminaziun da scleriments voluminus ha la regenza fixà las mesiras da sanaziun ch'èn necessarias per quest intent ed ha obligà las OEM da restituir a la Moesa ina quantitad d'aua en la dimensiun da 4.734 milliuns meters cubic per onn tar la tschiffada da Curina.

Meglierar las relaziuns da deflussiun en la Moesa
Il traject il pli impurtant da la Moesa ord vista da la pestga sa chatta tranter la tschiffada Curina ed Andrana en la planira da Pian San Giacomo. Cun la restituziun d'aua da dotaziun ordinada duai il potenzial da la Moesa sco territori da fregar per la litgiva d'aual puspè vegnir activà en quest traject planiv.

Consideraziun conscienziusa dals interess
La sanaziun da l'aua restanta stat en ina relaziun da tensiun da differents interess. Or da la vista da l'ecologia d'aua, da la pestga e da la scienza natirala ston las retratgas d'aua vegnir restrenschidas ad in minimum absolut. Per motivs da la protecziun dal clima, da l'utilisaziun raziunala da l'energia e dal provediment d'energia datti dentant er interess considerabels da limitar uschè pauc sco pussaivel la producziun d'electricitad sin basa da la forza idraulica. En sia decisiun ha la regenza considerà cun quità ils interess ed ordinà ina mesira da sanaziun ch'è acceptabla per tut las parts pertutgadas. Questa quantitad d'aua restanta ch'è vegnida fixada da nov importa per las OEM ina reducziun dal retgav da 5 pertschient.

Naginas mesiras ch'èn suttamessas a l'obligaziun da pajar ina indemnisaziun
La regenza ha desistì da prender mesiras da sanaziun che effectuassan per il chantun in'obligaziun da pajar ina indemnisaziun a las OEM. Ni en la Moesa ni en la Calancasca influenzeschan las retratgas d'aua cuntradas inventarisadas u spazis da viver inventarisads en tala maniera che mesiras da sanaziun, che van pli lunsch, stuessan vegnir ordinadas cun emprima prioritad.

En il Grischun adempleschan circa in quart da las retratgas d'aua las novas cundiziuns
La lescha federala davart la protecziun da las auas pretenda che tut las retratgas d'aua d'utilisaziuns existentas vegnian examinadas. Fin l'onn 2012 ston las mesiras da sanaziun eventualas esser realisadas. Dapi l'entrada en vigur da la lescha federala davart la protecziun da las auas èn en il chantun Grischun gia 50 da las 218 retratgas d'aua, ch'èn vegnidas examinadas, vegnidas adattadas a las novas disposiziuns en il dretg da l'ambient, e quai en connex cun novs concessiunaments u en il rom d'autras proceduras dal dretg da las auas. Las enconuschientschas che vegnan fatgas cun la sanaziun da l'aua restanta da las OEM vegnan duvradas per l'elavuraziun dals cas ch'èn anc pendents.


Infurmaziuns:
- cusseglier guvernativ Stefan Engler, schef dal departament da construcziun, traffic e selvicultura, tel. 081 257 36 01
- Alberto Crameri, secretari dal departament da construcziun, traffic e selvicultura dal Grischun, tel. 081 257 36 11


Gremi: regenza
Funtauna: rg chanzlia chantunala dal Grischun