En il rom dals discurs annuals tranter il chantun Grischun e la Posta svizra èn il president dal cussegl d'administraziun Claude Béglé ed il manader dal concern Michel Kunz sa scuntrads dacurt per ina discussiun cun il president da la regenza Hansjörg Trachsel. En quest connex è vegnì confermà il fatg ch'igl è impurtant per il chantun Grischun d'avair access als servetschs da posta en tut las regiuns.

Il president da la Posta Claude Béglé, il manader dal concern Michel Kunz, il manader dals uffizis postals Patrick Salamin ed il manader da la communicaziun Daniel Mollet han visità dacurt il chantun Grischun en il rom dals discurs annuals. A chaschun da la scuntrada cun il president da la regenza Hansjörg Trachsel èn las delegaziuns da la Posta e dal chantun Grischun sa fatschentadas intensivamain cun la problematica dal svilup e da l'adattaziun da la rait d'uffizis postals. L'impurtanza d'in access als servetschs da posta en tut las regiuns – er en la muntogna ed en la periferia – è vegnida confermada. La delegaziun da la Posta ha infurmà davart il svilup general dals servetschs da posta sin plaun naziunal ed en spezial davart la situaziun en il chantun Grischun.

Sviluppar ed adattar permanentamain ils servetschs da posta
Ils servetschs da posta tradiziunals survegnan adina dapli concurrenza d'alternativas electronicas (p.ex. e-mail, SMS, e-banking). En consequenza da quai fan blers uffizis postals damain svieuta. La clientella metta damain brevs e pachets sin posta u fa damain pajaments als spurtegls da posta. Tras in'adattaziun da la rait d'uffizis postals tegna la Posta quint da las novas relaziuns dal martgà e da las novas tecnologias. La Posta è obligada da sviluppar e d'adattar permanentamain ses puncts d'access als servetschs da posta, e quai per pudair furnir er en l'avegnir en tut las regiuns in provediment da basa d'auta qualitad. Pli e pli vegnan er renconuschids ils avantatgs da servetschs da posta che vegnan furnids en furma alternativa. Las agenturas, il servetsch a domicil ed ils paucs uffizis postals mobils chattan ina gronda acceptanza sco alternativas per ils uffizis postals tradiziunals. En sias finamiras strategicas pretenda il cussegl federal da la Posta che l'orientaziun a la clientella e che la rentabilitad stoppian vegnir meglieradas er vinavant. Sin basa da quai examinescha la Posta permanentamain sia rait d'uffizis postals.

Mantegnì las plazzas da lavur en il Grischun
Cun satisfacziun ha il chantun Grischun pudì prender enconuschientscha dal fatg ch'il dumber da collavuraturas e da collavuraturs è restà tut en tut stabil l'onn passà. En cumparegliaziun cun l'onn 2008 ha la Posta engaschà l'onn 2009 tschintg emprendistas ed emprendists supplementars. Per ils 31 d'october 2009 aveva la Posta 952 unitads da persunal en il chantun Grischun, repartidas sin 1'522 collavuraturas e collavuraturs sco er sin 44 emprendistas ed emprendists.

La rait d'uffizis postals vegn examinada
Sin basa da l'examinaziun actuala da 47 uffizis postals hai dà durant l'onn current adattaziuns en totalmain 12 vischnancas en il chantun Grischun. L'uffizi postal da Vrin vegn mantegnì. Per ils suandants uffizis postals vegnan ils servetschs da posta furnids en l'avegnir tras in servetsch a domicil: Cresta (vischnanca d'Avras), Li Curt (Puschlav), Maladers, Sursaissa Affeier, Giuvaulta, S. Carlo (Puschlav) ed Uors (Suraua). En las quatter vischnancas da Fideris, da Lostallo, da Sagogn e da Tarasp vegnan introducidas agenturas da posta.

Onn	uffizis postals	agenturas	uffizis postals mobils	puncts d'access total	servetsch a domicil	total
2005	144	37	5	186	90	276
2009	114	29	5	148	127	275

Funtauna: La Posta svizra (2005: cifras per la fin da l'onn; 2009: cifras per ils 31 d'october) 

Il Grischun pretenda in provediment da basa en tut las regiuns
En connex cun l'examinaziun da la rait d'uffizis postals èsi fitg impurtant per il chantun Grischun ch'il provediment da basa vegnia garantì en tut las regiuns. Da la Posta spetga il chantun d'ina vart ina politica da communicaziun transparenta ed onesta, da l'autra vart ch'i vegnian chattadas – ensemen cun las vischnancas pertutgadas – soluziuns constructivas e solidas. En cas che las soluziuns na vegnissan betg chattadas en enclegientscha, han las vischnancas la pussaivladad da consultar la cumissiun independenta dals uffizis postals per laschar controllar, sche la Posta ha – prendend sia decisiun – observà las prescripziuns da la legislaziun da posta.

Impurtanza speziala da l'auto da posta
In ulteriur tema da la scuntrada è stà la purschida da l'auto da posta. Sco med da traffic public fitg popular ha l'auto da posta ina impurtanza speziala en il chantun Grischun. Ils represchentants da la Posta svizra conferman il potenzial da svilup che l'auto da posta ha en il Grischun ensemen cun il turissem.


Infurmaziuns:
- president da la regenza Hansjörg Trachsel, schef dal departament d'economia publica e fatgs socials, tel. 081 257 23 01
- Daniel Mollet, manader da la communicaziun da la Posta, tel. 079 292 19 93


Gremi: departament d'economia publica e fatgs socials / Posta
Funtauna: rg departament d'economia publica e fatgs socials / Posta