Ensemen cun ils presidents d'urari regiunals e cun las interpresas da transport ha la procedura davart l'urari pudì vegnir terminada cun success. La midada da l'urari ils 13 da december 2009 optimescha la purschida da la viafier e dals bus en tut il chantun. Las midadas centralas concernan la circulaziun en il tact d'ina ura sin la lingia dal Bernina durant l'entir onn, in'extensiun da la purschida en la Bregaglia sco er dapli trens tranter Cuira e Ziegelbrücke. Malgrà dapli purschidas na vegnan ils pretschs da viadi betg augmentads.

En il rom da la procedura chantunala davart l'urari, che vegn realisada mintg'onn da l'uffizi d'energia e da traffic en stretga collavuraziun cun las interpresas da transport e cun ils 10 presidents regiunals d'urari, èn vegnidas inoltradas passa l'onn 2009 200 dumondas. 117 da quellas (58%) han pudì vegnir ademplidas per part u dal tuttafatg. Per motivs finanzials, pervia da premissas infrastructuralas u pervia d'interess che sa concurrenzeschan cun interess d'autras passagieras e d'auters passagiers n'han (anc) betg pudì vegnir realisads ils ulteriurs giavischs. Las meglieraziuns las pli impurtantas tar las viafiers federalas svizras (VFF), tar l'AutoDaPosta e tar la Viafier retica (VR) vegnan menziunadas qua sutvart:

Novas colliaziuns da las VFF la saira e la damaun
Da glindesdi fin sonda circuleschan trens supplementars IC da las VFF tranter Cuira e Turitg (IC 558). In tren parta la damaun da Cuira a las 5.06 ed arriva a Turitg a las 6.23 (ferma supplementarmain a Ziegelbrücke), l'auter parta la saira da Turitg a las 21.37 ed arriva a Cuira a las 22.52. Ils trens IC che partan da Basilea – Turitg rendan uschia accessibel il Grischun senza interrupziuns da las 6.37 fin las 21.37 (partenza da la staziun principala a Turitg). La saira serran trens regiunals supplementars las largias en il tact tranter Ziegelbrücke – Sargans e Cuira; arrivada a Cuira a las 21.02 ed a las 22.02, partenza da Cuira a las 20.57 ed a las 21.57.

Meglieraziuns sin diversas lingias da la Viafier retica
Sin la lingia dal Bernina vegn purschì durant l'entir onn il traffic regiunal en il tact d'ina ura tranter San Murezzan/Puntraschigna e Puschlav/Tiraun. Persunas indigenas, viandantas e viandants, skiunzas e skiunzs sco er ciclistas e ciclists da velo da muntogna pon viagiar durant l'entir onn mintg'ura sur il pass dal Bernina senza pajar in supplement.

La stad circuleschan ultra da quai ils trens cun vaguns da panorama da l'express dal Bernina. Ils giasts da l'express dal Bernina pon giudair il viadi pli svelt en il vagun da panorama che po esser fin 30 minutas pli curt. Las fins d'emna da l'enviern vegn l'express dal Bernina cun partenza a Cuira a circular da nov sco tren independent fin Tiraun.

Circa a partir dal matg 2010 vegnan ils emprims 4 da totalmain 15 vaguns a motor novs dal tip "Allegra" duvrads sin la lingia dal Bernina. Uschia pon vegnir augmentadas las plazzas da seser e la flexibilitad. La capacitad per velos vegn medemamain auzada levamain. L'enviern 2010/2011 èsi planisà da laschar circular tals vaguns a motor er sin la lingia da Cuira ad Arosa. Quels remplazzan las locomotivas e permettan dapli plazzas da seser.

Durant il temp da manaschi da la via da scarsolar da Preda a Bravuogn circuleschan "trens da scarsolas" supplementars sin la lingia da l'Alvra. Mintgamai las sondas, las dumengias ed ils firads, dals 26 da december 2009 fin ils 7 da mars 2010, circulescha in "tren da scarsolas" da Cuira a Preda, fa pliras giadas il viadi tranter Bravuogn e Preda e circulescha la saira da Bravuogn enavos a Cuira. Questa purschida supplementara distgargia ils trens da l'express dal Bernina tranter Cuira e San Murezzan e serva uschia er a la stabilitad da l'urari sin questa lingia fitg frequentada.

Glion survegn in'ulteriura colliaziun la saira; partenza a Cuira per Glion a las 21.59, partenza a Glion per Cuira a las 22.40. Il tren che parta da Tavau a las 20.31 e quel che parta da Filisur a las 21.07 circuleschan da nov durant l'entir onn.

Numerusas meglieraziuns pitschnas da la purschida tar l'AutoDaPosta Grischun
La purschida tranter San Murezzan – Malögia – Castasegna – Clavenna vegn engrondida fermamain: durant la stagiun da stad, dals 12 da zercladur fin ils 24 d'october, circuleschan 4 curs supplementars en mintga direcziun e permettan d'introducir la circulaziun en il tact d'ina ura durant l'entir di. La saira a las 21.31 ed a las 22.31 circuleschan supplementarmain bus sin dumonda fin a Castasegna (ed enavos). Durant l'enviern e durant la stagiun bassa circuleschan 3 curs dubels supplementars. Ils bus circuleschan uschia, ch'ils centers per il sport d'enviern da l'Engiadin'ota èn er bain cuntanschibels nà da la Bregaglia.

Il curs direct da Bellinzona a Cuira, partenza da Bellinzona a las 8.45, circulescha da nov durant l'entir onn e betg mo durant la stagiun da stad. Il curs direct cun partenza da Bellinzona a las 10.45 circulescha percunter mo pli durant la stagiun da stad, perquai ch'el na vegn strusch utilisà durant l'enviern. Da quest barat da l'urari resulta in niz supplementar per las passagieras e per ils passagiers sco er per las destinaziuns da sport d'enviern da San Bernardin e da Spleia.

Spleia – Clavenna: curs supplementars; partenza da Spleia a las 8.20, partenza da Clavenna a las 16.40. Ultra dal niz per la senda da viandar a lunga distanza "via Spluga", ch'è fitg frequentada, resultan da quai novas pussaivladads per viandar resp. per cumbinar: excursiuns da ed en la Bregaglia sco er da ed en l'Engiadin'ota.

Scuol – Martina – Samignun – (Landeck) – (Nauders): Da Martina vegnan prolungads da nov mintga duas uras curs fin a Nauders, cun ina colliaziun optimala da ed a Mals. Viadis circulars tranter l'Engiadina bassa ed il Tirol dal sid vegnan uschia pli attractivs. La stad vegnan purschidas 2 colliaziuns supplementaras tranter Scuol e Samignun senza midar auto da posta; partenza da Scuol a las 10.30, partenza da Samignun a las 14.10.


Infurmaziuns:
- Ernst Bachmann, manader da l'uffizi d'energia e da traffic, tel. 081 257 36 21
- Werner Glünkin, manader da la partiziun per il traffic public, uffizi d'energia e da traffic, tel. 081 257 36 17


Gremi: uffizi d'energia e da traffic
Funtauna: rg uffizi d'energia e da traffic