Sco planisà terminescha il chantun Grischun la fin da december 2009 l'introducziun da la refurma da l'administraziun GRiforma en tut l'administraziun chantunala entaifer il termin fixà. Ils novs instruments directivs procuran per dapli transparenza en connex cun las prestaziuns statalas e cun lur custs.

Sut il num da project GRiforma ha la regenza grischuna suttamess l'avust 2003 – suenter ina fasa da pilot da 4 onns – al cussegl grond il "rapport davart l'evaluaziun da la fasa d'emprova e davart l'ulteriur andament da la refurma da l'administraziun GRiforma". Sin fundament da quests resultats ha il cussegl grond prolungà la fasa da pilot per 3 ulteriurs onns. L'october 2006 ha il cussegl grond prendì enconuschientscha dal rapport final ed ha approvà l'introducziun en tut l'administraziun en trais etappas. La fin da december 2009 vegn terminada la fasa d'introducziun.
Entaifer il termin fixà midan – cun il preventiv 2010 – ils ultims posts da servetsch da l'administraziun chantunala a quest nov sistem da gestiun. L'introducziun ha pudì vegnir realisada entaifer il spazi da temp fixà sco er cun las resursas persunalas previsas ed ha chaschunà damain custs che supponì oriundamain.

Novaziun essenziala
Il chantun Grischun dispona oz d'instruments directivs generals ch'èn accordads bain in cun l'auter. Ina da las finamiras da GRiforma è stada quella, da detretschar pli fitg las cumpetenzas e las responsabladads politicas, strategicas ed operativas. Il cussegl grond ha fixà la structura da las gruppas da products sco er ils effects, la regenza ha fatg prescripziuns davart las finamiras e davart ils indicaturs. Cun agid da questas acziuns sco er cun midar al preventiv global cun libertads d'agir meglieradas per ils posts da servetsch ha pudì vegnir realisada questa finamira. Da nov vegn er fatga ina calculaziun dals custs e da las prestaziuns. Quest nov sistem directiv procura per dapli transparenza en connex cun las prestaziuns statalas e cun lur custs. En l'avegnir pon vegnir fatgas er evaluaziuns da l'economia da manaschi che stgaffeschan ina basa impurtanta per discussiuns e per decisiuns realpoliticas sin tut ils nivels.

Terminaziun dal project e perspectiva
Cun la terminaziun dal project per la fin da december 2009 vegn schliada l'organisaziun dal project. Latiers tutgan la direcziun dal project e la giunta directiva che ha accumpagnà il project durant l'entira fasa d'introducziun. Il num GRiforma na vegn betg pli utilisà. Las modificaziuns ch'èn colliadas cun la midada a la nova gestiun publica da las prestaziuns statalas èn vegnidas realisadas definitivamain. Ils process ed ils instruments ston dentant vegnir sviluppads vinavant permanentamain er en l'avegnir.


Infurmaziuns:
- cusseglier guvernativ dr. Martin Schmid, schef dal departament da finanzas e vischnancas,
tel. 081 257 32 13
- Sandra Felix, economa per strategia da finanzas/manadra dal project da GRiforma,
tel. 081 257 32 18


Gremi: departament da finanzas e vischnancas
Funtauna: rg departament da finanzas e vischnancas