Il concept per sanar l'edifizi Cleric (l'anteriur seminari da magistras e da magisters) fa
part dal project general "Sanaziun architectonica da la scola chantunala grischuna a
Cuira". Sco ulteriura etappa impurtanta dal concept general duai quest edifizi ussa
vegnir renovà. Quai propona la regenza en sia missiva dals 31 da mars 2009 ch'è
vegnida tractada da la cumissiun predeliberanta cumpetenta dal cussegl grond sut il
presidi dal deputà Christian Möhr. A la sesida è sa participà er il cusseglier guvernativ
Stefan Engler.
L'edifizi ch'è vegnì construì ils onns 1962 fin 1964 sto vegnir sanà. Ils mirs exteriurs da
l'edifizi n'adempleschan tranter auter betg pli las pretensiuns areguard l'isolaziun
termica respectivamain las pretensiuns da la legislaziun chantunala d'energia. La
sanaziun da la fatschada externa, dal tetg e da las fanestras ch'è planisada duai
plinavant gidar ad ademplir las prescripziuns dal standard da MINERGIE. Ultra da quai
èn las chavas en l'edifizi contaminadas cun PCB e ston vegnir allontanadas e
dismessas en moda professiunala. Er ston vegnir renovads ils indrizs da la tecnica da
chasa e las installaziuns sanitaras. Ils custs per sanar l'edifizi Cleric en moda
cumplessiva importan totalmain 26 milliuns francs.
La sanaziun è in ulteriur element impurtant en il rom da la renovaziun totala currenta da
la scola chantunala grischuna. Il project persvada la cumissiun areguard la qualitad ed
areguard l'economia e garantescha che la scola chantunala s'etableschia en moda
persistenta sco impurtanta instituziun chantunala da furmaziun. Correspundentamain
recumonda ella unanimamain al cussegl grond da conceder il credit d'impegn da 26
milliuns francs.
Las investiziuns principalas per la sanaziun da la chasa Cleric vegnan fatgas gia a
partir da la stad 2010. Uschia cumbattan questas investiziuns – en il senn d'ina mesira
per stabilir la conjunctura che po vegnir realisada directamain – las tendenzas da
conjunctura negativas en il chantun. Sch'il cussegl grond accepta il project, pon ins
cumenzar cun las lavurs da sanaziun il fanadur 2010. Quellas duran previsiblamain fin
la mesadad da l'onn 2012.
Infurmaziuns:
deputà Christian Möhr, president da la cumissiun predeliberanta,
tel. 081 302 23 32
Gremi: cumissiun predeliberanta dal cussegl grond
Funtauna: rg cumissiun predeliberanta dal cussegl grond