Ils temas centrals èn la politica d'energia, las tecnologias da
communicaziun ed ils animals da rapina gronds
La politica d'energia e la politica d'infrastructura stattan en il
center da la 40avla conferenza plenara da las scheffas e dals schefs da
las regenzas da la cuminanza da lavur da las regiuns alpinas (ARGE ALP)
dals 18/19 da zercladur a Flem. Spetgads vegnan represchentantas e
represchentants illusters da las regenzas dals stadis da la ARGE ALP.
Cun la conferenza da las scheffas e dals schefs da las regenzas va a fin
l'onn presidial dal Grischun ed il presidi vegn surdà a la provinza
autonoma Bulsaun-Tirol dal sid.
Il presidi da la conferenza da las scheffas e dals schefs da las
regenzas da la ARGE ALP a Flem ha il cusseglier guvernativ grischun
Martin Schmid. Sco participants da las provinzas autonomas talianas
Bulsaun-Tirol dal sid e Trento vegnan il guvernatur Luis Durnwalder ed
il president da la regenza Lorenzo Dellai. Da l'Austria sa
participeschan il guvernatur dal Vorarlberg Herbert Sausgruber, il schef
da l'uffizi da la regenza da Salzburg Heinrich Christian Marckhgott sco
er il viceguvernatur dal Tirol Anton Steixner. Il stadi liber tudestg da
la Baviera vegn represchentà dal sutdirectur dal ministeri Jörg Vogel e
dals chantuns svizzers Son Gagl e Tessin vegnan spetgads ils cussegliers
guvernativs Willi Haag e Marco Borradori.
Planisà resoluziuns davart la politica d'energia e davart la
politica d'infrastructura
A la conferenza da las scheffas e dals schefs da las regenzas vegn
la ARGE ALP a tractar sco temas politics centrals las dumondas d'energia
ch'èn impurtantas per il territori alpin sco er il provediment cun
tecnologias modernas da l'infurmaziun e da la communicaziun. Per tuts
dus secturs tematics duain vegnir deliberadas resoluziuns. En il sboz da
resoluziun davart la politica d'energia insista la ARGE ALP che la forza
idraulica sco energia regenerabla la pli impurtanta duai vegnir
promovida e meglierada en sia effizienza, nua che quai è raschunaivel
dal puntg da vista economic ed ecologic. Ultra da quai cuntegna il sboz
da resoluziun in appel da la ARGE ALP a las regenzas naziunalas ed a la
UE d'integrar las finamiras a lunga vista da la societad da 2000 watts
en lur programs e da las realisar.
En il sectur da la politica d'infrastructura pretenda la ARGE ALP
tenor il sboz da resoluziun da cumplettar ad ura, dapertut, en moda
persistenta e segira l'infrastructura per las tecnologias modernas
d'infurmaziun e da communicaziun en il territori alpin. Per che er las
regiuns alpinas possian profitar da las schanzas da las tecnologias
modernas, sto - gist en regiuns periferas - vegnir impedida ina
spartiziun digitala en territoris che han in provediment suffizient ed
en territoris che han in provediment betg suffizient.
Animals da rapina gronds en las Alps
Sco ulteriur tema central vegn preschentà a la conferenza er il
project "Animals da rapina gronds en las Alps". Quest project ch'è vegnì
lantschà dal Grischun sa fatschenta cun l'urs, cun il luf u cun il
luf-tscherver - animals da rapina gronds ch'eran ina giada da chasa en
las regiuns alpinas. Prendì en mira vegn ina collavuraziun
transcunfinala en il senn d'in barat d'experientschas sin plaun
professiunal. Ils animals da rapina gronds che vivan en libertad sa
derasan pli e pli fitg. Pertutgads da questa derasaziun n'èn numnadamain
betg mo quels stadis che promovan lur domiciliaziun. Anzi, sche las
populaziuns creschan, bandunan singuls animals baud u tard quests
territoris ed emigreschan en pajais vischins. Ina collavuraziun dals
pajais da las Alps en quest sectur è pervia da quai impurtanta, betg sco
ultim er per evitar conflicts.
La ARGE ALP lantscha divers projects novs
Per promover il contact tranter las burgaisas ed ils burgais
lantscha e sa participescha la ARGE ALP a differents projects
internaziunals. Per mauns da la conferenza da las scheffas e dals schefs
da las regenzas ha la giunta directiva inoltrà en tut indesch projects
novs. Tranter quels sa chattan ils projects ch'èn vegnids inoltrads dal
Tirol dal sid "Project da giuvenils respect, confidenza e speranza",
"Carburants alternativs en il territori alpin", "L'avertura d'areals
d'abitadi champesters en il territori alpin", "Gruppa da lavur
neuroreabilitaziun" sco er il project "Brain drain en ils pajais da la
ARGE ALP". Ultra da quai vul la ARGE ALP introducir in "Barat per
emprender linguas per scolaras e per scolars dal stgalim superiur
secundar" sco er collavurar tar la "Academia europeica da talents a
Lindau".
Tar ils novs projects tutgan plinavant la "Dieta speziala davart
documents digitals en ils archivs dal territori alpin" ed il project
"Alp house - cultura architectonica alpina ed ecologia". L'intent da
quest project è quel da sviluppar vinavant las cumpetenzas da manaschis
da mastergn locals per sanar edifizis vegls ed abitadis alpins
resguardond l'effizienza energetica. La finala ston ils schefs da las
regenzas decider davart ils projects "Ecologia ed economia en il guaud
da protecziun" e "Lavur ed economia cun persunas immigradas en il
territori alpin". La ARGE ALP vul er cuntinuar ils proxims onns cun il
project da sport per giuvenils che vegn tgirà dal Grischun. A las
concurrenzas da sport transcunfinalas en set disciplinas èn sa
participads passa 1500 giuvenils l'onn 2007/2008.
Surdada dal premi da la ARGE ALP e midada dal presidi
La ARGE ALP ha mess in accent frestg e stgaffì ina vischinanza a las
burgaisas ed als burgais publitgond il premi da la ARGE ALP 2009. Da 112
contribuziuns ha ina giuria dad 11 expertas ed experts tschernì trais
titularas e titulars sco er in titular per il premi da giuventetgna. A
la conferenza da las scheffas e dals schefs da las regenzas vegnan ussa
communitgads las victuras ed ils victurs. Questa concurrenza è vegnida
publitgada il december passà sco premi da musica e duai dar ina vusch a
la giuventetgna.
Cun la conferenza da las scheffas e dals schefs da las regenzas va a
fin l'onn presidial dal Grischun. Il cusseglier guvernativ Martin Schmid
vegn a surdar il presidi a Luis Durnwalder, guvernatur da la provinza
autonoma Bulsaun-Tirol dal sid. La ARGE ALP, ch'è vegnida fundada l'onn
1972, è stada en tut l'Europa l'emprima uniun cumparegliabla d'unitads
statalas ed autonomas sin in plaun sut ils stadis naziunals e federals.
Cun ina collavuraziun transcunfinala ha la ARGE ALP la finamira da
tractar ils interess cuminaivels da ses commembers, cunzunt en il sectur
cultural, social, economic ed ecologic. La ARGE ALP vul er svegliar la
conscienza per la responsabladad cuminaivla per il spazi da viver alpin,
promover ils contacts tranter las abitantas ed ils abitants dal
territori alpin, rinforzar la posiziun dals stadis, da las regiuns, da
las provinzas e dals chantuns e contribuir - ensemen cun autras
instituziuns - ina part a la collavuraziun en l'Europa.
Ulteriuras infurmaziuns:
Ina survista dals projects da la ARGE ALP po vegnir chargiada giu
qua .
www.argealp.org
Infurmaziuns:
- cusseglier guvernativ dr. Martin Schmid, parsura da la ARGE ALP,
tel. 081 257 32 01
Gremi: chanzlia chantunala dal Grischun
Funtauna: rg chanzlia chantunala dal Grischun