Il chantun Grischun duai gidar a finanziar la rait da provediment da
chalur a distanza dal stabiliment per arder ruments ch'è planisada da
Trimmis a Cuira nord. La regenza grischuna propona ina contribuziun
chantunala da 3,7 milliuns francs als custs d'investiziun. Ella ha
deliberà la missiva correspundenta per mauns dal cussegl grond. Quel
vegn a tractar la fatschenta en la sessiun d'avust.
Ina cuminanza d'interess - che sa cumpona da la corporaziun da
vischnancas per la dismessa da ruments en il Grischun (GEVAG), da la IBC
"energia aua", Cuira, e da l'ospital chantunal dal Grischun -
planisescha da construir in conduct da chalur a distanza davent dal
stabiliment per arder ruments a Trimmis fin a Cuira. La finamira è
quella da proveder edifizis da l'ospital chantunal e da la scola
chantunala sco er autras immobiglias chantunalas pli grondas sin il
territori da Cuira nord cun energia termica.
Tenor la regenza èsi spezialmain raschunaivel d'utilisar la chalur
persa, perquai ch'i vegn tratg a niz chalur che resulta tuttina. Quai
gida a segirar il provediment, a reducir l'emissiun da CO2 sco er a
remplazzar purtaders d'energia fossils. Betg mo areguard la politica
d'energia, mabain er sco mesira cunter las tendenzas economicas
negativas èsi - tenor la regenza - raschunaivel da conceder ina
contribuziun a la rait da chalur a distanza.
Igl è previs ch'il stabiliment per arder ruments a Trimmis
furneschia mintga onn energia termica en la dimensiun da var 40 milliuns
uras da kilowatt a la rait da chalur a distanza da Cuira. Concretamain
vegn l'aua - ch'è vegnida stgaudada sin 120 grads tras la combustiun
dals ruments - transportada en bischens sutterrans a Cuira. Tras la
colliaziun da differents edifizis publics cun la rait da chalur a
distanza sa laschan spargnar mintga onn var 8'800 tonnas CO2. Plinavant
vegn reducida la dependenza da purtaders d'energia fossils, quai che
permetta da remplazzar mintga onn in equivalent da var 3,8 milliuns
liters ieli da stgaudar.
En in'emprima ed en ina segunda fasa duain la chasa evangelica da
persunas attempadas e da tgira a Cuira, la chasa da burgaisas e da
burgais, la clinica psichiatrica Waldhaus, la chasa da persunas
attempadas Kantengut, la scola auta da pedagogia e l'ospital chantunal
vegnir colliads cun la rait da chalur a distanza. Pli tard pon vegnir
colliads anc auters edifizis da l'administraziun chantunala. L'urari
prevesa da cumenzar a construir ils conducts durant il quart quartal da
l'onn 2009. Sche tut proceda sco previs, pudess la rait da chalur a
distanza vegnir messa en funcziun durant il quart quartal da l'onn 2010.
Schanza per midar a l'energia regenerabla
Tant ord vista tecnica sco er areguard la politica d'energia e
d'ambient giuditgescha la regenza il project sco persistent e degn da
vegnir sustegnì. Ina participaziun al project correspunda a la politica
chantunala d'energia. Per il chantun sco consument final grond resulta
qua tras ina vaira schanza da midar da purtaders d'energia fossils a la
chalur a distanza che vegn producida cun energia regenerabla.
Tut en tut quinta l'instituziun responsabla cun custs d'investiziun
da 26,8 milliuns francs per construir ils conducts e las installaziuns
tecnicas. La regenza propona al cussegl grond da sustegnair la rait da
chalur a distanza cun ina contribuziun chantunala d'investiziun da 3,7
milliuns francs. Sco mesira che po vegnir realisada directamain per
stabilisar la conjunctura duai questa contribuziun la finala er
cumbatter las tendenzas conjuncturalas negativas en il chantun.
Infurmaziuns:
cusseglier guvernativ Stefan Engler, schef dal departament da
construcziun, traffic e selvicultura, tel. 081 257 36 01
Gremi: regenza
Funtauna: rg chanzlia chantunala dal Grischun