La regenza grischuna ha prendì enconuschientscha dal fatg, ch'il conclus federal davart ina finanziaziun supplementara temporara da l'assicuranza d'invaliditad tras in augment da las tariffas da la taglia sin la plivalur e ch'il conclus federal davart la renunzia a l'introducziun da l'iniziativa dal pievel generala vegnan suttamess sco projects federals a la votaziun dal pievel da dumengia, ils 27 da settember 2009. A questa votaziun na vegnan suttamess nagins projects chantunals.
Mess en vigur la lescha introductiva tar la legislaziun federala davart ils esters ed ils fatgs d'asil
La regenza grischuna ha mess en vigur la lescha introductiva tar la legislaziun federala davart las persunas estras e davart ils fatgs d'asil per il 1. d'avust 2009. Il chantun Grischun adatta uschia sia legislaziun al nov dretg da persunas estras ed al nov dretg d'asil da la confederaziun. La lescha stgaffescha tranter auter la basa legala per l'integraziun da persunas estras en il chantun Grischun. A medem temp ha la regenza relaschà ils detagls en in'ordinaziun e mess en vigur tala medemamain per il 1. d'avust 2009.
Ils 10 da december 2008 aveva il cussegl grond deliberà la lescha introductiva tar la legislaziun federala davart las persunas estras e davart ils fatgs d'asil. Il termin da referendum è scadì ils 18 da mars 2009, entaifer quest termin n'èn vegnids inoltrads nagins referendums.

La regenza sustegna la revisiun da la lescha federala davart il CO2
La regenza grischuna beneventa il fatg, che la confederaziun vul stgaffir regulaziuns liantas per reducir l'emissiun da CO2 dals autos da persunas. Sco quai ch'ella menziunescha en sia resposta da consultaziun a la confederaziun sustegna ella la revisiun planisada da la lescha davart il CO2. Las mesiras proponidas han cleras finamiras ed èn adattadas per quai. La regenza è er da l'avis ch'i saja gist da s'orientar vi da l'uniun europeica e da surpigliar las finamiras d'emissiun e las normas da svapur da tala. Tenor la regenza èsi plinavant impurtant che ulteriuras mesiras e che ulteriurs projects planisads sco per exempel la metoda da bonus-malus tar la taglia federala sin ils vehichels vegnia coordinada cun quest sboz da la lescha. En sia resposta da consultaziun sustegna la regenza dal rest il giudicament da la conferenza svizra da las directuras e dals directurs da construcziun, da planisaziun e da protecziun da l'ambient (CCPA) sco er da la conferenza da las directuras e dals directurs chantunals d'energia (CDEn).

La suttascripziun da la convenziun dal cussegl da l'Europa per la protecziun d'uffants cunter l'explotaziun sexuala vegn beneventada
En sia resposta da consultaziun a la confederaziun s'exprima la regenza grischuna per suttascriver la convenziun dal cussegl da l'Europa per la protecziun d'uffants cunter l'explotaziun sexuala e cunter l'abus sexual. La finamira da questa convenziun è quella da proteger il svilup sexual dals uffants e dals giuvenils senza disturbis, e quai en l'entira Europa en moda uschè cumplessiva sco pussaivel ed en moda preventiva. La convenziun è l'emprim instrument internaziunal che declera las differentas furmas da l'abus sexual d'uffants sco chastiablas en moda cumplessiva.
Ella cuntegna obligaziuns che tutgan exclusivamain u per part al champ da cumpetenzas dals chantuns. En cas d'ina participaziun na datti - tenor indicaziuns da la regenza - nagin basegn legislativ d'agir en il chantun Grischun.

Da vischnancas e da regiuns
Tenna: La regenza garantescha a la vischnanca da Tenna ina contribuziun da 101'300 francs per renovar il provediment d'aua Mitti - Innerberg.
Langwies: Il project "dustanza Ronggwald" da la vischnanca da Langwies vegn approvà e sustegnì cun ina contribuziun da maximalmain 61'500 francs.
Partenz: Il plan directiv regiunal "Alpen", ch'è vegnì concludì da la corporaziun regiunala pro Partenz ils 26 da november 2008, vegn approvà.
Schlarigna: La nova constituziun da la vischnanca da Schlarigna dals 4 da matg 2009 vegn approvada.
Sumvitg: La nova constituziun da la vischnanca da Sumvitg dals 7 da zercladur 2009 vegn approvada, cun excepziun dals al. 3 e 4 da l'art. 33.
Zizers: La revisiun parziala da la constituziun communala da la vischnanca da Zizers, ch'è vegnida concludida a la votaziun a l'urna ils 30 da november 2008, vegn approvada, cun excepziun da l'al. 3 da l'art. 28.
Surses: Ils novs "statuts da la scola cirquitala da Surses" dals 10 da zercladur 2009 vegnan approvads.
Lumnezia: La revisiun parziala dals statuts dal consorzi da scola "Scola primara Lumnezia-dado" vegn approvada. Ella entra en vigur per l'onn da scola 2009/2010.
Brinzauls: La revisiun parziala da la planisaziun locala, che la radunanza communala da la vischnanca da Brinzauls ha concludì ils 20 da mars 2009, vegn approvada.
Puntraschigna: La revisiun parziala da la planisaziun locala da la vischnanca da Puntraschigna dals 28 d'october 2008 vegn approvada.
Trimmis: La revisiun parziala da la planisaziun locala da la vischnanca da Trimmis, ch'era vegnida concludida ils 16 da december 2008, vegn approvada.
Tschlin: La planisaziun d'utilisaziun "Deponia Prà Dadora", che la vischnanca da Tschlin ha concludì ils 14 da matg 2008, vegn approvada.

Chanzlia chantunala dal Grischun
Gremi: regenza
Funtauna: rg chanzlia chantunala dal Grischun