La legislaziun federala davart ils products terapeutics chaschuna pervia da l'urden da cumpetenzas ch'è vegnì midà tranter la confederaziun ed ils chantuns che las disposiziuns dal dretg chantunal concernent il sectur dals medicaments stoppian vegnir adattadas. La regenza grischuna ha avert la consultaziun correspundenta per relaschar ina lescha introductiva tar la lescha davart ils products terapeutics.
Dapi l'entrada en vigur da la lescha federala davart ils medicaments ed ils products medicinals è il tractament da medicaments reglà per tut la Svizra en moda unifitgada. En il champ da cumpetenza dals chantuns è restada la regulaziun dals manaschis da medicaments en il commerzi en detagl sco en spezial da las apotecas e da las drogarias publicas, dentant er da las apotecas privatas da persunas medicinalas sco er d'apotecas privatas dals ospitals e da las chasas da tgira. Qua sa restrenscha la confederaziun a reglar tscherts secturs spezials sco per exempel il martgà da spediziun, il scumond da far reclama e tschertas prescripziuns concernent l'inscripziun, concernent la consegna e concernent l'applicaziun da medicaments.
Il sboz da la lescha chantunala davart ils products terapeutics surpiglia per la gronda part regulaziuns existentas. Da nov pon mo pli persunas medicinalas sco er droghistas e droghists che han in diplom federal consegnar medicaments. Plinavant vul il chantun introducir in'obligaziun d'annunzia per medicaments che vegnan producids en in'apoteca u en ina drogaria publica tenor in'atgna furmla. Uschia pon las autoritads controllar en moda efficazia, sche quests preparats èn cumponids tenor il stadi da la scienza e tenor il stadi da la tecnica. Quai augmenta la segirezza dals medicaments e la protecziun per las pazientas e per ils pazients. Da nov dovran las medias ed ils medis sco er las dentistas ed ils dentists ina permissiun speziala per manar in'apoteca privata u in deposit da medicaments.
Ils documents da consultaziun pon ins consultar sin la pagina d'internet dal departament da giustia, segirezza e sanadad www.djsg.gr.ch sut la rubrica "temas/projects". La consultaziun dura fin ils 15 d'october 2009.

Gremi: regenza
Funtauna: rg chanzlia chantunala dal Grischun