La rait radiofonica da catastrofas e da polizia che vegn utilisada oz en il Grischun è antiquada e duai vegnir remplazzada tras ina nova rait radiofonica da segirezza. Quai propona la regenza al cussegl grond en sia missiva davart la concessiun d'in credit d'impegn per realisar la part chantunala da la rait radiofonica da segirezza POLYCOM. Il parlament vegn a tractar questa fatschenta en la sessiun d'avrigl.
La rait radiofonica da catastrofas e da polizia existenta (DISCO) da la polizia chantunala sto vegnir remplazzada urgentamain tras in nov sistem radiofonic. La regenza propona perquai al cussegl grond da conceder in credit d'impegn per installar ina nova rait radiofonica da segirezza. Da nov permetta quella da colliar las partenarias ed ils partenaris da la protecziun da la populaziun e da las organisaziuns d'intervenziun d'urgenza cun ina rait radiofonica che correspunda als basegns. En il chantun Grischun utiliseschan las autoritads e las organisaziuns da salvament e da segirezza (polizia, pumpiers, servetschs da salvament, protecziun civila, guardias da cunfin e furmaziuns da sustegn da l'armada) oz differentas raits radiofonicas. Ellas pon communitgar ina cun l'autra mo en furma nuncodada sur il chanal da coordinaziun. Il nov sistem radiofonic previs POLYCOM vegn utilisà er da la confederaziun e dad auters chantuns. Auters sistems radiofonics èn medemamain vegnids examinads. Quels n'adempleschan dentant betg la finamira da colliar tut las partenarias e tut ils partenaris da la protecziun da la populaziun e da las organisaziuns d'intervenziun d'urgenza cun ina rait radiofonica. Plinavant paja la confederaziun mo contribuziuns per realisar la rait radiofonica da segirezza POLYCOM.
Per in provediment radiofonic suffizient dal chantun dovri tut en tut 91 staziuns da basa en l'entir Grischun. 57 staziuns da basa vegnan construidas e finanziadas dal corp da guardias da cunfin. Il chantun sto construir e finanziar 34 staziuns da basa. Per realisar la part chantunala da la rait radiofonica da segirezza propona la regenza al cussegl grond da conceder in credit d'impegn da 55 milliuns francs bruts. A questas investiziuns sa participeschan l'uffizi federal da vias, l'uffizi federal da protecziun da la populaziun, il corp da guardias da cunfin sco er l'armasuisse. Al chantun Grischun resta ina grevezza netta da 27.4 milliuns francs per installar l'infrastructura.
La nova rait radiofonica da segirezza duai vegnir installada dal corp da guardias da cunfin en collavuraziun cun il chantun. Uschia sa laschan cuntanscher sinergias tar la realisaziun dal project ed i pon vegnir spargnads custs. Il plan da termins prevesa che la rait radiofonica po vegnir messa en funcziun mez da l'onn 2012, suenter che l'infrastructura è installada. La nova rait radiofonica duai vegnir manada e mantegnida tras in center da cumpetenza che suttastat a la responsabladad communabla dal chantun e dal corp da guardias da cunfin. Quest center da cumpetenza vegn domicilià tar la polizia chantunala. Ils custs da gestiun nets vegnan calculads cun var 2.3 milliuns francs per onn. Suenter la deducziun da la participaziun dal corp da guardias da cunfin dastgassan resultar custs annuals da var 1.2 milliuns francs per il chantun.

Infurmaziuns:
cussegliera guvernativa Barbara Janom Steiner, scheffa dal departament da giustia, segirezza e sanadad, tel. 081 257 25 01

Gremi: regenza
Funtauna: rg chanzlia chantunala dal Grischun