Il chantun Grischun ha concepì da nov ed unifitgà sias paginas d'internet. En in emprim pass è il portal www.gr.ch vegnì mess sin la rait la fin da favrer. La plattafurma survesaivla metta a disposiziun a las burgaisas ed als burgais ina purschida attractiva d'infurmaziuns.

Ultra dal portal d'entrada da www.gr.ch sa laschan trair a niz en lur nov vestgì er las paginas d'internet da la chanzlia chantunala e dals tschintg departaments. In design modern sco er in access standardisà e simplifitgà a las infurmaziuns ed a las prestaziuns da servetsch dal chantun porschan in nov divertiment da navigaziun. En ina segunda fasa duain - fin mez da l'onn - er las paginas dals passa 30 singuls posts da servetsch vegnir adattadas e vegnir colliadas en etappas cun la nova plattafurma.

Unifitgà l'access
La nova plattafurma d'internet communabla porta differentas meglieraziuns en cumparegliaziun cun las paginas da fin ussa. Fin ussa avevan las paginas d'internet dals singuls departaments e posts da servetsch differentas concepziuns. Ussa publitgeschan ils departaments ed ils posts da servetsch lur infurmaziuns en rubricas unitaras. In access facil porscha il nov index da chavazzins. En l'avegnir cuntegna quest index links ad infurmaziuns da l'entira administraziun. Uschespert che tut ils posts da servetsch han migrà lur paginas d'internet, vegn plinavant messa a disposiziun a las burgaisas ed als burgais ina pagina d'access separada cun in catalog da chavazzins ch'è ordinà tenor dumondas che resultan da la vita da mintgadi. Quest catalog da temas e da servetschs sa basa sin ils standards tecnics da la strategia dad egovernment da la Svizra.

Basa per extender las prestaziuns da servetsch
Il chantun è sa decidì da proceder pass per pass, midond al nov vestgì d'internet, e quai en vista a la gronda spessezza d'infurmaziuns sco er a la cumplexitad da las differentas applicaziuns sin las paginas d'internet da l'administraziun. Fin mez da l'onn duain tut ils posts da servetsch avair migrà lur paginas d'internet sin la nova plattafurma. Applicaziuns cumplexas vegnan remplazzadas fin la fin da l'onn. Il hosting da la nova plattafurma unitara, che vegn administrada sin basa da Microsoft Office Share Point Server 2007, è vegnì surpiglià da l'uffizi d'informatica. Uschia pon ils departaments ed ils posts da servetsch er adattar ed actualisar sezs las paginas. Il nov sistem stgaffescha ultra da quai las premissas per ch'il chantun possia sviluppar en l'avegnir novas purschidas dad egovernment, sco per exempel proceduras da permissiun e da pajament.

Paginas d'internet senza barrieras: per part gia realitad
Il nov vestgì da las paginas d'internet ademplescha per part las premissas per paginas d'internet senza barrieras per utilisadras e per utilisaders cun impediments. En la versiun finala duai la purschida d'internet pudair vegnir duvrada - en accordanza cun la lescha davart l'egualitad dals impedids - cumplainamain er d'umans cun impediments. L'organisaziun "Access per tuts" controllescha ch'il portal n'haja naginas barrieras.

Gremi: chanzlia chantunala dal Grischun
Funtauna: rg chanzlia chantunala dal Grischun