Retratga da la patenta da pestga per la stagiun da pestga 2009

Tar las preparativas per la stagiun da pestga tutga er la retratga da la patenta da pestga.
Per pudair retrair la patenta per in onn u ina patenta mensila ston ins cumprovar ch'ins haja enconuschientschas da la pestga (attest obligatoric SaNa). Per quest intent vegnan purschids il mument en differents lieus dal chantun Grischun curs da scolaziun.
Tut las patentas pon vegnir retratgas tar la surveglianza da pestga resp. tar il biro per passaports e patentas. En il fegl uffizial dal chantun Grischun dals 26 da mars 2009 u sin la pagina d'internet da l'uffizi da chatscha e pestga www.jagd-fischerei.gr.ch èn publitgads per ils singuls districts da pestga ils lieus e las datas per retrair la patenta sco er las premissas per pudair retrair la patenta (attest davart las enconuschientschas da la materia "SaNa" ed attest da domicil en cas che terzas persunas retiran la patenta). Sche terzas persunas vulan retrair la patenta per ina persuna cun domicil en il chantun Grischun, ston ellas preschentar in attest da domicil persunal da questa persuna. Il formular correspundent po vegnir chargià giu da la pagina d'internet da l'uffizi da chatscha e pestga. En cas ch'ina persuna fa ina dumonda en scrit per retrair ina patenta, sto ella agiuntar in attest da domicil.

Cun buna pestga!

Gremi: uffizi da chatscha e pestga dal Grischun
Funtauna: rg uffizi da chatscha e pestga dal Grischun