La regenza grischuna na po betg approvar l'introducziun d'in numer d'identificaziun da las interpresas (IDI), sco quai ch'ella è planisada actualmain en il sboz da consultaziun. Ella beneventa bain da princip l'introducziun d'ina identificaziun unitara per interpresas. Uschia pudessan quellas vegnir identifitgadas cleramain, ed en connex cun ils andaments administrativs e statistics pudess vegnir meglierà il barat d'infurmaziuns. Il numer d'identificaziun stgaffiss ultra da quai la premissa per barattar en moda pli simpla las datas electronicas e gidass a distgargiar l'administraziun da las interpresas. Plinavant fiss quel ina cundiziun generala impurtanta per extender las prestaziuns da servetsch en il sectur dal egovernment. Sco quai che la regenza scriva en sia resposta, n'è il project anc betg madir e sto anc vegnir repassà intensivamain. En spezial stoi vegnir fixà cleramain, tgi che duai survegnir in numer d'identificaziun. Ultra da quai n'è betg clera la pratica da las cassas da cumpensaziun ed er betg quella da las vischnancas. Plinavant è er la cunfinaziun cun ils numers da rendaquint e cun ils registers existents intscherta. Tenor la resposta da la regenza ston vegnir formuladas per quest intent cleras directivas.

La regenza refusa la revisiun da la lescha federala davart l'assicuranza militara
La regenza grischuna refusa la versiun da la revisiun da la lescha federala davart l'assicuranza militara ch'è ussa avant maun. Tenor la resposta da consultaziun chaschuna la revisiun previsa reducziuns da las prestaziuns e largias tar la cuvrida per las appartegnentas e per ils appartegnents da l'armada. Plinavant vegn er reducida la garanzia tras l'assicuranza tar las persunas assicuradas da professiun. Sco quai che la regenza grischuna menziunescha pon las appartegnentas ed ils appartegnents da l'armada vegnir confruntads cun ristgas persunalas considerablas durant il servetsch militar. Per quest intent duai vegnir purschida ad ellas ed ad els ina garanzia adequata tras l'assicuranza. Quai vala er per tut las persunas che prestan servetsch da protecziun civila u servetsch civil. Damai ch'i manca ina clera motivaziun, fissi in fauss signal da metter - cun la revisiun da la lescha federala respectiva - las persunas che fan servetsch militar en ina mendra posiziun che quella dad oz.

Da vischnancas e da regiuns
- Braggio: Per renovar e per engrondir il provediment d'aua approvescha la regenza ina contribuziun da var 145'800 francs.
- Churwalden: Il plan dal cunfin tranter las vischnancas da Churwalden e da Vaz vegn approvà.
- Stussavgia: A l'associaziun per il provediment d'aua da Stussavgia Plaz vegn garantida ina contribuziun pauschala da 185'400 francs per renovar e per engrondir il stabiliment dal provediment d'aua.
- Seewis: A Seewis Vitg e Val vegnan fixadas las sveltezzas maximalas entaifer l'entir vitg a 30 km/h ed introducidas "zonas da tempo 30", e quai integrond parzialmain la via chantunala. Entaifer il vitg da Seewis Pardisla, sin la via veglia dal Partenz en la regiun dal negozi da laina da Jakob Berger, vegn reducida la sveltezza maximala dad 80 km/h a 60 km/h.
- Trimmis: Sin la Rheinstrasse a Trimmis vegn reducida la sveltezza maximala existenta dad 80 km/h a 60 km/h, e quai per il traject dal spartavias per la staziun da Vaz sut fin a l'anteriura fermada da la Viafier retica a Trimmis. A medem temp vegn introducì sin quest traject l'urden da traffic che vala entaifer il vitg.

Contribuziuns chantunalas a differentas instituziuns
Promoziun da la cultura: La regenza sustegna la festa uffiziala per l'inventarisaziun da l'arena tectonica Sardona sco patrimoni natiral mundial da la UNESCO cun ina contribuziun en furma d'ina garanzia da deficit da maximalmain 75'000 francs. La festa ha lieu da Tschuncaisma, ils 30 da matg fin il 1. da zercladur 2009, a Flem.
Telefericas Spleia-Tambo: Per construir la nova sutgera da sis conceda la regenza ina contribuziun chantunala da 252'500 francs.

Collecta da la rogaziun federala
Mintgamai in terz dal retgav da la collecta da la rogaziun federala vegn concedida quest onn a l'associaziun grischuna da las famiglias cun persunas malsaunas da schizofrenia e cun persunas cun ina malsogna psichica (AFS), Cuira, a l'uniun per l'accumpagnament da persunas grevamain malsaunas e muribundas a Cazas/Cuira sco er a la fundaziun succurs d'enviern dal Grischun.

Projects da vias
La regenza ha approvà totalmain 8'208'000 francs per construir e per sanar ils suandants trajects da vias:
- via dal Meir: lavurs d'impressari e da cuvrida, Solas - tunnel d'Alvaschagn
- via dal Scanvetg: lavurs d'impressari, tumbin da la chava da gera da St. Peter
- via da Samignun: lavurs d'impressari e da cuvrida, Laret - Plan
- via dal Güglia: lavurs da terra, rempar da retegnida a Brinzauls
- via da la Mantogna dadens: lavurs d'impressari, Tschappina sura - Glas
- H27 via d'Engiadina: lavurs da cuvrida, sviament da Schlarigna
- H29 via dal Bernina: lavurs da cuvrida, access Puntraschigna Muragl - access Puntraschigna Bernina
- A28 via naziunala: lavurs d'impressari, sviament da Küblis
Chanzlia chantunala dal Grischun

Gremi: regenza
Funtauna: rg chanzlia chantunala dal Grischun