Ils examens d'admissiun al gimnasi inferiur vegnan adattads. A partir d'immediat vegnan tut las scolaras e tut ils scolars examinads e giuditgads mo pli en lur emprima lingua ed en matematica. Quai ha concludì la regenza grischuna cun approvar la revisiun parziala correspundenta da l'ordinaziun davart la procedura d'admissiun a las scolas medias. Las adattaziuns entran en vigur il 15 da matg 2009.
Ellas vegnan fatgas pervia d'ina sentenzia da la dretgira administrativa. Quella aveva constatà ils 5 da matg 2009 ch'in examen d'admissiun, tar il qual ils uffants cun rumantsch u cun talian sco emprima lingua vegnan examinads er en tudestg, cuntrafetschia a la prescripziun da l'egualitad giuridica, sche uffants da lingua tudestga na vegnian betg er examinads en ina segunda lingua chantunala.
Il tractament inegual ch'è vegnì pratitgà fin ussa, tenor il qual tut las candidatas e tut ils candidats fan in examen en tudestg, ha la dretgira administrativa qualifitgà sco illegal. D'ina vart, perquai che las candidatas ed ils candidats da lingua tudestga na vegnan betg er examinads en ina segunda lingua chantunala, e da l'autra vart, perquai che las notas da lingua vegnan summadas ad in'unica nota da rom d'examen per candidatas e per candidats da lingua rumantscha e da lingua taliana. Cun sia sentenzia ha la dretgira administrativa sclerì ina dumonda giuridica delicata ch'è d'ina gronda impurtanza er per la politica da linguas e da furmaziun.
Per tegnair quint da las pretensiuns da la sentenzia giudiziala ha la regenza gia adattà - en vista als examens d'admissiun dal zercladur 2009 - l'ordinaziun davart la procedura d'admissiun a las scolas medias. Tut ils uffants vegnan examinads a l'examen d'admissiun a l'emprima classa dal gimnasi mo en quella lingua ch'els inditgan sco lur emprima lingua ed en matematica. Questa concepziun vala sco regulaziun transitorica. La finamira è quella che las scolaras e ch'ils scolars da scolas primaras tudestgas duain vegnir examinads (ultra en tudestg ed en matematica) er en rumantsch u en talian a partir da l'onn 2012. A partir da quest termin duain er scolaras e scolars da lingua rumantscha e taliana puspè far in examen en tudestg. Uschia duain tut ils uffants vegnir examinads en la procedura d'admissiun a l'emprima classa dal gimnasi en duas linguas chantunalas ed en matematica.

Infurmaziuns:
dr. Hans Peter Märchy, manader da l'uffizi per la furmaziun media-superiura,
tel. 081 254 12 31

Gremi: regenza
Funtauna: rg chanzlia chantunala dal Grischun