A partir da mesemna saira, ils 20 da matg 2009, a las 21.00, è la via da Samignun puspè averta per il traffic. Grazia ad in grond engaschament èsi reussì als spezialists da construcziun da reparar en in temp da record da mo trais emnas la galaria cunter lavinas ch'è vegnida donnegiada il cumenzament d'avrigl.

Ina lavina da naiv bletscha ha donnegià gievgia, ils 2 d'avrigl 2009, la galaria cunter crudada da crappa e cunter lavinas "Val Pischöt" uschè grevamain che la via da Samignun ha stuì vegnir serrada ad interim. La galaria datescha dals onns 1920. Durant la serrada era il Samignun cuntanschibel mo sur la via da val da la vart austriaca.
Suenter ch'il privel da lavinas è sa reducì, è dals 20 fin ils 23 d'avrigl 2009 la paraid da crap che sa chatta sur la galaria vegnida deliberada sco emprim da la crappa lucca e da la naiv. Alura è la part da mez dad 8 meters da la galaria ch'è vegnida donnegiada, vegnida sbuvada. Per las registraziuns dal territori, per giuditgar ils donns vi da l'ovra da construcziun, per decider il gener da las mesiras da reparatura e per la lavur da projectaziun sco tala èn stads a disposiziun mo paucs dis. Uschia ha la firma da construcziun locala ch'è vegnida incumbensada pudì cumenzar cun las lavurs da reparatura gia il proxim glindesdi, ils 27 d'avrigl 2009. Fin ad otg collavuraturs da l'interpresa da construcziun han lavurà - per part en duas squadras - vi da la sbuvada, vi dal far mantè, vi da l'armar e vi dal betunar la nova part parziala. Perquai ch'igl è stà difficil da cuntanscher il plazzal che sa chattava vi d'ina spunda taissa da la Val Pischöt, han ils totalmain 35 meters cubic betun stuì vegnir sgulads sin il plazzal e culads en il mantè cun l'helicopter. Resguardond il temp d'almain 7 dis ch'è necessari per ch'il betun en il mantè daventia dir, po la via da Samignun puspè vegnir averta per il traffic mesemna saira avant Ascensiun. Ils custs totals da las lavurs da reparatura vi da la galaria "Val Pischöt" importan circa 200'000 francs.

Infurmaziuns:
- Peter Stirnimann, responsabel per las medias, uffizi da construcziun bassa, tel. 081 257 37 11 u 079 291 72 75
- Reto Knuchel, schef dal mantegniment da vias/districts, uffizi da construcziun bassa, tel. 079 629 81 14

Gremi: uffizi da construcziun bassa
Funtauna: rg uffizi da construcziun bassa