Sut il presidi da la deputada e presidenta da la cumissiun Susanne
Krättli-Lori ha la cumissiun dal cussegl grond per furmaziun e cultura
(CFC) predeliberà la missiva da la regenza tar la participaziun a la
cunvegna interchantunala davart la collavuraziun en il sectur da la
pedagogia speziala (concordat da la pedagogia speziala) per mauns dal
cussegl grond. Cusseglier guvernativ Claudio Lardi, schef dal
departament d'educaziun, cultura e protecziun da l'ambient, ha
medemamain prendì part a la sesida da la cumissiun.
Ils 25 d'october 2007 è il concordat da la pedagogia speziala vegnì
deliberà da la radunanza plenara da la conferenza svizra da las
directuras e dals directurs chantunals da l'educaziun publica (CDEP)
senza cuntravuschs. Cun la participaziun s'oblighescha il chantun da
collavurar en il sectur da la pedagogia speziala. En quest connex duai
en spezial vegnir fixada la purschida da basa che garantescha, che
uffants e che giuvenils cun in basegn da furmaziun spezial vegnian
furmads ed assistids, che l'integraziun da quests uffants e da quests
giuvenils en la scola regulara vegnia promovida e ch'i vegnia fixada
in'obligaziun per applitgar instruments e proceduras cuminaivlas ed
unitaras. Quest concordat è ina consequenza directa da la nova
concepziun da la gulivaziun da finanzas e da la repartiziun da las
incumbensas tranter la confederaziun ed ils chantuns che ha surdà als
chantuns la responsabladad professiunala, giuridica e finanziala en il
sectur da la scola speziala.
Suenter ina discussiun intensiva ha la cumissiun per furmaziun e
cultura decidì unanimamain da sistir la debatta d'entrada e da la
reprender pir, cur ch'il cussegl grond ha tractà la revisiun totala da
la lescha davart las scolas popularas dal chantun Grischun (lescha da
scola) e cur che quella è vegnida acceptada dal pievel. La revisiun
totala da la lescha da scola, che regla da nov er il sectur da la
scolaziun speziala, sa chatta actualmain en la procedura da
consultaziun. Pervia da quai vuless la cumissiun spetgar la deliberaziun
da la lescha da scola, avant che tractar in'eventuala participaziun al
concordat da la pedagogia speziala.
Correspundentamain vegn il cussegl grond a sa fatschentar cun il
concordat da la pedagogia speziala pir suenter il tractament da la
revisiun totala da la lescha da scola.
Infurmaziuns:
Susanne Krättli-Lori, cumissiun per furmaziun e cultura, tel. 078
668 01 63
Gremi: cumissiun per furmaziun e cultura
Funtauna: rg cumissiun per furmaziun e cultura