Las scheffas ed ils schefs da las regenzas da la cuminanza da lavur da las regiuns alpinas (ARGE ALP) sa fatschentan - sut il presidi dal cusseglier guvernativ Martin Schmid - cun dumondas da l'energia. A la proxima conferenza da las scheffas e dals schefs da las regenzas dals 18/19 da zercladur 2009 a Flem vegn preschentà in studi da cumparegliaziun davart l'utilisaziun d'energias regenerablas e davart resursas natiralas en ils pajais da las Alps e deliberada ina resoluziun davart la politica d'energia. La resoluziun duai esser in confess per las finamiras a lunga vista d'ina societad da 2000 watts. Cun la conferenza da las scheffas e dals schefs da las regenzas va a fin l'onn presidial da la ARGE ALP dal Grischun.

Cun il presidi da la ARGE ALP è il chantun Grischun sin buna via. A la conferenza da las scheffas e dals schefs da las regenzas a Prien aveva il Grischun surpiglià il zercladur 2008 da la Baviera - confurm al turnus - per in onn il presidi da la ARGE ALP. L'ultima giada ha il Grischun presidià la ARGE ALP ils onns 1993 e 1994. Durant ses onn presidial ha il Grischun vulì tschentar differents accents. Gia il december passà ha gì lieu cun success il simposi davart "La via futura da la ARGE ALP - sfidas e perspectivas". L'occurrenza che ha gì lieu ils 10 da december 2008 en il cussegl grond a Cuira durant la sessiun dal parlament ha chaschunà ina discussiun animada davart la rolla e davart il futur da la ARGE ALP.
Il Grischun è in dals commembers fundaturs da la cuminanza da lavur da las regiuns alpinas (ARGE ALP). La ARGE ALP, ch'è vegnida fundada l'onn 1972, era en tut l'Europa l'emprima fusiun cumparegliabla d'unitads statalas ed autonomas sin il plaun sut ils stadis naziunals e federals. Da la ARGE ALP fan part ils stadis federativs austriacs Tirol, Salzburg e Vorarlberg, da l'Italia las provinzas autonomas Bulsaun-Tirol dal sid e Trento sco er la regiun Lumbardia, da la Germania il stadi liber da la Baviera e da la Svizra ils chantuns Tessin, Son Gagl e Grischun.

Dumondas d'energia en il center da la conferenza
Sco ulteriur accent politic en la ARGE ALP vegn il chantun Grischun a tematisar la dumonda d'energia. En vista a la discussiun a chaschun da la proxima conferenza da las scheffas e dals schefs da las regenzas dals 18/19 da zercladur 2009 a Flem ha il chantun Grischun dà l'incumbensa per in studi da cumparegliaziun davart l'utilisaziun d'energias regenerablas e davart las mesiras da l'effizienza energetica en ils pajais commembers da la ARGE ALP. La politica d'energia è per il territori alpin da gronda impurtanza, e quai per differents motivs: Sco sistem ecologic fitg sensibel è il territori alpin pertutgà extraordinariamain da la midada dal clima. Cun sias resursas per il futur ch'èn avant maun amplamain contribuescha il territori alpin ultra da quai considerablamain ad in provediment d'energia ch'è favuraivel per il clima. Plinavant è l'economia d'energia in motor impurtant per l'economia.
Gist en il territori alpin existan las schanzas spezialas d'engrondir la part d'energias regenerablas e dad augmentar a medem mument la valurisaziun en la regiun. En il rom d'in sboz da resoluziun ch'è vegnì inoltrà dal chantun Grischun vegnan las scheffas ed ils schefs da las regenzas da la ARGE ALP a discutar davart la societad da 2000 watts e davart la surpigliada da sias finamiras a lunga vista. Tenor quella na duai mintga uman da quest mund betg duvrar a vista mesauna dapli che 2000 watts energia. Plinavant constatescha il sboz da resoluziun che la forza idraulica sco energia regenerabla la pli impurtanta duai vegnir promovida e meglierada en sia effizienza, nua che quai è raschunaivel dal puntg da vista economic ed ecologic. En quest connex duai il potenzial da la forza idraulica vegnir utilisà en moda persistenta tar novas construcziuns, tar renovaziuns e tar engrondiments. Ultra da quai duai il territori alpin pudair profitar adequatamain da l'aua sco resursa d'energia.

Cunter ina spartiziun digitala
Ultra da la politica d'energia vegnan las scheffas ed ils schefs da las regenzas da la ARGE ALP a sa fatschentar a lur conferenza er cun tecnologias modernas d'infurmaziun e da communicaziun. Gist il territori alpin pudess profitar da quai en il futur. Per che quai saja il cas sto dentant l'infrastructura vegnir garantida ad ura e dapertut. La ristga en regiuns alpinas e periferas è dentant quella che las novas tecnologias vegnan savens introducidas cun retard u ch'ellas n'èn insumma betg disponiblas. Ina resoluziun davart il tema da la societad d'infurmaziun e da la politica d'infrastructura ch'è vegnida inoltrada dal Grischun fa attent ch'ina infrastructura ch'è adequata per las novas tecnologias da communicaziun è d'ina impurtanza centrala per il territori alpin. Pervia da quai stuess la politica sustegnair sin differents plauns la cumplettaziun da l'infrastructura a bindel lad. Oravant tut en regiuns periferas sto - cun agid da mesiras adattadas - vegnir impedida ina spartiziun digitala en territoris che han in provediment suffizient ed en territoris che han in provediment betg suffizient.

Dar ina vusch a la giuventetgna cun il premi da musica da la ARGE ALP
In accent frestg metta il Grischun durant ses onn presidial tras la publicaziun dal premi da la ARGE ALP 2009. Questa concurrenza è vegnida publitgada il december passà sco premi da musica e duai dar ina vusch a la giuventetgna. Premiada vegn ina contribuziun musicala che sa fatschenta en moda creativa cun il tema da las Alps. A medem temp duai il premi da la ARGE ALP - ch'è dotà cun 15'000 euros - gidar a promover musicistas giuvnas e musicists giuvens en il territori alpin ed als dar la pussaivladad da sa preschentar en tut il territori da la ARGE ALP. A la conferenza da las scheffas e dals schefs da las regenzas vegnan ussa communitgads las victuras ed ils victurs dal premi da musica. En tut èn vegnidas inoltradas 112 contribuziuns. Ina giuria internaziunala ha elegì las victuras ed ils victurs.
Infurmaziuns:
- cusseglier guvernativ dr. Martin Schmid, parsura da la ARGE ALP, tel. 081 257 32 01

Gremi: chanzlia chantunala dal Grischun
Funtauna: rg chanzlia chantunala dal Grischun