Sut il presidi da Franco Quinter ha la cumissiun per economia e taxas (CET) predeliberà la missiva tar la revisiun parziala da la lescha da taglia per mauns dal cussegl grond. Il cussegl grond ha tractandà questa fatschenta per la sessiun da zercladur 2009. A questa sesida è stà preschent er il cusseglier guvernativ Martin Schmid, schef dal departament da finanzas e vischnancas.
Tras questa revisiun parziala duai la lescha da taglia vegnir adattada en nov puncts. Quai èn: in levgiament tar la taglia sin la facultad, ina reducziun da la taglia sin il gudogn, in augment da las deducziuns per ils custs da la tgira d'uffants, ina gulivaziun da la progressiun fraida, la refurma da la taglia sin interpresas II, taglias supplementaras e penalas, la lescha davart il stadi ospitant, il mantegniment d'immobiglias ed il center da cumpetenza per l'incassament. La finamira da la revisiun è quella da render il chantun Grischun pli attractiv sco plazza fiscala tant per persunas natiralas sco er per persunas giuridicas. Plinavant daventan tschertas midadas necessarias perquai che la lescha chantunala sto vegnir adattada al dretg fiscal federal armonisà. I n'è betg ina finamira da la revisiun da promover la concurrenza fiscala cun ils chantuns vischins; plitost duai la revisiun parziala permetter al chantun Grischun da cumpensar ils dischavantatgs ch'el aveva fin ussa en la concurrenza fiscala.
Suenter avair discutà detagliadamain davart il project ha la cumissiun concludì unanimamain d'entrar en il project e da proponer al cussegl grond d'acceptar il sboz da lescha da la regenza. En la tractativa detagliada vegn la cumissiun a proponer al cussegl grond da midar er l'art. 38 da la lescha da taglia; las deducziuns per uffants che pon vegnir fatgas valair tar las entradas vegnissan augmentadas. Dal rest suonda la cumissiun la missiva da la regenza, mintgamai cun ina cuntravusch pertutgant la reducziun da la grevezza maximala tar la taglia sin la facultad e pertutgant la reducziun da la taglia sin il gudogn da las persunas giuridicas sin la tariffa unitara da 5.5 pertschient.

Infurmaziuns:
president da la cumissiun Franco Quinter, tel. 079 682 47 47

Gremi: cumissiun per economia e taxas
Funtauna: rg cumissiun per economia e taxas