Dals 15 fin ils 18 da zercladur 2009 fa il cussegl grond ina sessiun en la regiun a Puschlav. Questa sessiun "extra muros" vegn actualmain preparada cun plaina forza. L'emprima sessiun en il Grischun talian stat sut il motto "Incontro - Inscunter - Begegnung".

Sin proposta da la conferenza da las presidentas e dals presidents aveva il parlament tschernì il zercladur 2008 Puschlav sco lieu da sessiun. Igl è quai l'emprima sessiun "extra muros" dal parlament chantunal en il Grischun talian. En il passà han gia gì lieu sessiuns d'ordaifer a Mustér, a Tavau ed a Landquart.
La sessiun en la regiun a Puschlav dura quatter dis, e quai da glindesdi, ils 15 da zercladur, fin gievgia, ils 18 da zercladur. I vegn sa radunà en la chasa da scola Santa Maria a Puschlav. Il secretariat dal cussegl grond da la chanzlia chantunala è vegnì incumbensà cun l'organisaziun da questa sessiun. Actualmain vegn ella preparada cun plaina forza. Il comité d'organisaziun da la vischnanca da Puschlav procura per l'alloschament da las commembras e dals commembers dal parlament e per il program accumpagnant spezial durant questa sessiun. Ultra da quai sto vegnir installada l'infrastructura tecnica ch'è necessaria al lieu.

Program accumpagnant multifar
Las deputadas ed ils deputads duain survegnir a Puschlav la pussaivladad d'emprender d'enconuscher pli bain la populaziun. Il motto da la sessiun "extra muros" è "Incontro - Inscunter - Begegnung". Latiers ha la vischnanca da Puschlav arranschà in program accumpagnant cultural, sportiv e culinaric interessant e multifar. Il viadi da las deputadas e dals deputads a Puschlav duai gia esser spezial. Igl è planisà ch'ellas e ch'els viageschan glindesdi, ils 15 da zercladur, cun in tren spezial da la viafier retica da Puntraschigna a Puschlav. A las 13.00 è previs il bainvegni uffizial tras represchentantas e tras represchentants da la vischnanca a la staziun da Puschlav. Suenter ina spassegiada a la chasa da scola Santa Maria cumenza la sessiun a las 14.30 cun in pled dal president dal cussegl grond.
La mesemna avantmezdi, ils 17 da zercladur, sa preschentan las quatter regiuns dal Grischun talian (Bregaglia, Calanca, Mesauc e Puschlav) al parlament en la sala da la sessiun. La mesemna vers saira è previs in program accumpagnant uffizial cun visitas culturalas ed economicas per las deputadas e per ils deputads. Eleger pon ellas ed els tranter ina visita da la Rezia energia ed ina visita da Puschlav e da la Casa Console. La saira, a partir da las 19.00, ha lieu in apero cun giasts envidads sco er cun las deputadas e cun ils deputads sin l'areal da scola a Puschlav. Suenter vegnan las deputadas ed ils deputads envidads a la tschaina ensemen cun ils giasts uffizials.
Ultra da quai han las organisaturas ed ils organisaturs arranschà in program da sport facultativ per las deputadas e per ils deputads, e quai mintga damaun avant las sesidas. Er il mardi saira, ils 16 da zercladur, han lieu activitads sut tschiel avert. I vegnan fatgas gitas en la Val di Campo u da Puschlav a Miralago, ina tura cun velo da muntogna. Plinavant ha lieu in gieu da ballape tranter ils represchentants dal cussegl grond ed ils veterans da Valposchiavo Calcio.

La glista da tractandas è lunga
A la sessiun "extra muros" a Puschlav na spetgan las deputadas ed ils deputads betg mo daletgs culturals, sportivs e culinarics, mabain er ina glista da tractandas fitg lunga. Tranter auter èsi previs da cuntinuar a deliberar la nova concepziun da la gulivaziun da finanzas e da la repartiziun da las incumbensas tranter il chantun e las vischnancas (NGF grischuna). Tractandadas vegnan ultra da quai er las suandantas fatschentas: il quint dal chantun 2008, la revisiun parziala da la lescha da taglia, la sanaziun da la scola chantunala Cleric a Cuira sco er la missiva davart la structura da las gruppas da products e davart ils effects da GRiforma (3. etappa). Las sesidas dal parlament èn publicas sco a Cuira. Las persunas interessadas pon persequitar quellas davent da las tribunas publicas.
L'onn passà è l'organisaziun da la sessiun en la regiun vegnida publitgada uffizialmain per chattar candidaturas. Gia il favrer 2007 aveva il cussegl grond acceptà cun gronda maioritad ina proposta da prender in conclus direct concernent il cussegl grond "extra muros". En spezial il fatg che sessiuns en la regiun han gia gì lieu - en cas da renovaziuns da l'edifizi dal cussegl grond a Cuira - en il passà a Mustér, a Tavau ed a Landquart, dentant anc mai en il Grischun talian, ha incità la conferenza da las presidentas e dals presidents da proponer al cussegl grond da far la sessiun da zercladur 2009 a Puschlav. Ils custs supplementars per la realisaziun da la sessiun "extra muros" sa chattan en il rom dal preventiv concludì dal cussegl grond e vegnan stimads a ca. 120'000 francs.

Gremi: chanzlia chantunala dal Grischun
Funtauna: rg chanzlia chantunala dal Grischun