Animar la populaziun da mintga vegliadetgna a dapli moviment ed ad in nutriment pli saun: quai è l'intent da l'emprima "sonda en moviment" dals 13 da zercladur a Cuira. Per dar appetit serva il program varià.

La "sonda en moviment" è part integrala dal program "grischun en moviment". Quel è vegnì lantschà l'atun 2008 da l'uffizi da sanadad dal chantun Grischun en collavuraziun cun la promoziun da la sanadad Svizra. El cumpiglia actualmain 18 projects, la gronda part è concepida per uffants (pitschens) sco er per scolaras e per scolars. La "sonda en moviment" è l'unica occurrenza ch'è destinada per tut la populaziun. L'emprim sa concentrescha ella sin Cuira, in'extensiun sin autras regiuns è planisada per ils proxims onns.

Integrar il moviment en il mintgadi
La "sonda en moviment" che ha lieu ils 13 da zercladur 2009, furma ina "punt" ed in access simpel al mund dal sport. Tut las purschidas èn gratuitas per las participantas e per ils participants. En il center stat l'access plain plaschair a dapli moviment ed al sport. Questa occurrenza duai sa drizzar a tut las gruppas da vegliadetgna da l'uffant pitschen fin a la persuna che retira ina renta. Pervia da quai è il program fitg vast: Ultra d'ina tenda d'infurmaziun cumpiglia el ina controlla medicinala, cun la quala vegnan controllads e giuditgads a partir da las 9 il zutger dal sang ed il squitsch dal sang sco er il colesterin e la funcziun dal lom. Ultra da quai datti la pussaivladad tar quest check-up d'absolver tests da l'equiliber, da la forza e da l'agilitad.
Eveniments en gruppa vegnan pussibilitads tras differents moduls da moviment che vegnan purschids dad uniuns da Cuira en il center da la citad: uschia per exempel in chastè da sigliottar, ina paraid da raiver ed in rollomobil, dentant er ballarait, judo, in percurs per velos da muntogna, ir cun l'aissa-ruletta e cun patins cun rodas. En questa ultima disciplina fan las persunas interessadas in pèr giadas in viadi circular sin in traject segirà. Er las persunas ch'èn entusiasmadas dal viandar na vegnan betg a la curta: ellas pon tscherner tranter ina gita en citad, ina gita da jazz u ina gita d'iert. Il punct final è in eveniment sin in culm dal Mittenberg. Inclus en quai è in'excursiun infurmativa sin la senda da viandar segnada cun bandieras davent da Kleinwaldegg.

La "sonda senza fin" sco inspiraziun
Il titel da l'occurrenza "sonda en moviment" è vegnì tschernì sin basa da la "sonda senza fin - 12 uras cultura a Cuira". Cun la "sonda en moviment" duai la populaziun vegnir animada en moda termaglianta, raschunaivla ed orientada a l'eveniment da sa muventar dapli e da sa nutrir en moda pli sauna. I dovra pauc per laschar cuntentar ils uffants spontanamain lur basegn da moviment innat. Studis mussan dentant che bleras mattas e che blers mats sco er che bleras dunnas e che blers umens sa muventan memia pauc. Per uffants vala in'ura da moviment sco minimum, per creschids vala sco regla generala ina mes'ura al di en ina intensitad media (quai vul dir ch'ins sto sa mover uschia ch'ins sua levamain e ch'ins ha ina respiraziun levamain accelerada). Per quai na vegn gnanc duvrà in mument spezial. Il moviment sa lascha integrar en il mintgadi cun prender consequentamain la stgala, cun far in marsch a pè u cun ir cun velo.
Ulteriuras infurmaziuns ed il program detaglià da la "sonda en moviment" survegnis Vus sin l'internet sut www.graubuenden-bewegt.ch .

Infurmaziuns:
- Denise Rudin, manadra dal project "grischun en moviment", uffizi da sanadad,
tel. 081 257 25 18
- Renato Lanfranchi, vicemanader da l'uffizi da sanadad, tel. 081 257 26 14

Gremi: uffizi da sanadad
Funtauna: rg uffizi da sanadad