La regenza ha classifitgà da nov las vischnancas grischunas per ils onns 2010 e 2011 tenor lur forza finanziala. Sche la NGF grischuna po vegnir messa en vigur sco previs per il 1. da schaner 2011, vala questa classificaziun mo per l'onn 2010.
Dapi l'ultima classificaziun da la forza finanziala per ils onns 2008 e 2009 èn vegnidas realisadas sis fusiuns da vischnancas, trais ulteriuras èn planisadas per il 1. da schaner 2010. Il dumber da vischnancas sa reducescha pervia da quai da 203 a 180 e correspundentamain sa mida la repartiziun en las singulas gruppas da forza finanziala. Senza resguardar las midadas da la gruppa che han gì lieu pervia da las fusiuns menziunadas, datti midadas tar 22 vischnancas en connex cun lur classificaziun en las gruppas da forza finanziala envers la classificaziun vertenta. Quests spustaments èn in pau pli pitschens cumpareglià cun las ultimas duas calculaziuns, nua ch'èn vegnidas fatgas 25 resp. 27 midadas. 8 vischnancas fan ina midada pervia da la classificaziun al cunfin d'ina gruppa da forza finanziala vischina, tar 7 vischnancas chaschuna ina modificaziun da lur pe da taglia ina nova classificaziun. En 6 cas ha il svilup da la forza fiscala effectuà ina midada da la gruppa, entant ch'il basegn finanzial dad 1 vischnanca è stà il motiv per la midada. 7 vischnancas vegnan messas en in'autra gruppa pervia da lur dretgs spezials ch'ellas han survegnì en la gulivaziun da finanzas.
13 vischnancas cun 11'117 abitantas ed abitants midan ad in gruppa da forza finanziala pli debla, da l'autra vart vegnan 9 vischnancas cun 9'765 abitantas ed abitants classifitgadas da nov en ina gruppa da forza finanziala pli ferma. La nova classificaziun vegn ad engrevgiar las finanzas dal chantun Grischun minimalmain pli ferm en il sectur da la gulivaziun da finanzas indirecta. Da las vischnancas pli grondas midan Flem, Claustra-Serneus, Mesauc e Sumvitg en ina gruppa pli flaivla, entant che Panaduz, Zizers e Zuoz appartegnan da nov ad ina gruppa pli ferma.

Infurmaziuns:
Thomas Kollegger, schef da l'uffizi da vischnancas, tel. 081 257 23 81, e-mail: thomas.kollegger@afg.gr.ch

Agiunta:
Nova classificaziun da las vischnancas en gruppas da forza finanziala tenor la publicaziun en il fegl uffizial dals 3 da settember 2009

Gremi: regenza
Funtauna: rg chanzlia chantunala dal Grischun