Otg chantuns lantschan in project cuminaivel

Las Svizras ed ils Svizzers a l'exteriur duain da nov survegnir la pussaivladad da votar per internet. Per quest intent han las regenzas dals chantuns Friburg, Soloturn, Schaffusa, Son Gagl, Grischun, Argovia e Turgovia - cun la cooperaziun dal chantun Turitg sco part che conceda ina licenza - fatg contracts da collavuraziun. La soluziun electronica sur l'internet vegn a star a disposiziun a las votantas ed als votants svizzers che vivan a l'exteriur il pli baud a partir da l'onn 2010.

Passa in terz da circa 117'000 Svizras e Svizzers a l'exteriur che han il dretg da votar han lur sedia politica en ils otg chantuns participads. Questa gruppa da votantas e da votants ha in interess spezialmain grond vi dal "vote électronique". I capita adina puspè che cuvertas da votar da l'exteriur arrivan memia tard al biro da votaziun. La votaziun per internet facilitescha pia a las Svizras ed als Svizzers a l'exteriur da sa participar a la vita politica da lur patria.
La lescha federala davart ils dretgs politics da las Svizras e dals Svizzers a l'exteriur pussibilitescha als chantuns da laschar votar per internet las Svizras ed ils Svizzers a l'exteriur. Mo las Svizras ed ils Svizzers a l'exteriur che vivan en in pajais che sa participescha als contracts da Wassenaar http://www.wassenaar.org davart l'utilisaziun da programs da computer e d'autra rauba da diever dubel pon duvrar il sistem da votaziun. Circa 90 pertschient da tut las Svizras e da tut ils Svizzers a l'exteriur vivan en tals pajais.
Ils set chantuns partenaris e la chanzlia federala sviluppan in'applicaziun d'informatica sin la basa dal model dal e-voting da Turitg. La collavuraziun pussibilitescha als chantuns participads da sbassar ils custs. Il basegn d'adattaziun en la legislaziun ed en l'execuziun è differenta da chantun a chantun. Pervia da quai na po il program betg vegnir realisà en tut ils chantuns il medem mument. En il cas il pli favuraivel pon vegnir fatgas las emprimas emprovas en singuls chantuns participads la fin da l'onn 2010. Il sistem vegn purschì en tut las quatter linguas naziunalas.
La confederaziun sa participescha vi dals projects da pilot davart la votaziun electronica per internet en ils chantuns Genevra, Neuchâtel e Turitg. Ils set chantuns participads fan part dal project da Turitg, perquai che la plattafurma d'informatica purschida s'adatta bain cun l'organisaziun dals dretgs politics da quests chantuns. Quest project è l'emprim pass dals chantuns participads en il sectur da la votaziun per internet. Las experientschas duain vegnir utilisadas pli tard en vista ad in engrondiment eventual per las votantas e per ils votants che vivan en Svizra.

Gremi: chanzlia chantunala dal Grischun
Funtauna: rg chanzlia chantunala dal Grischun