La vischnanca da Zernez ed il chantun Grischun suttascrivan ina cunvegna davart la collavuraziun per l'emissiun da documents d'identitad. A partir dal 1. da mars 2010 maina la vischnanca da Zernez in center da documents d'identitad per il chantun Grischun. En quest center pon vegnir registradas las datas biometricas ch'èn necessarias per il nov passaport svizzer.

Per il 1. da mars 2010 introducescha la confederaziun en l'entira Svizra datas biometricas en il passaport svizzer. La regenza grischuna ha decidì gia l'onn 2008 da registrar las datas biometricas en maximalmain tschintg centers da documents d'identitad regiunals. Per entant duain vegnir averts dus centers da documents d'identitad. Ultra da Cuira maina la vischnanca da Zernez en l'avegnir in center da documents d'identitad regiunal per l'Engiadina e per las vals dal sid per incumbensa dal chantun Grischun.

La cussegliera guvernativa Barbara Janom Steiner, scheffa dal departament da giustia, segirezza e sanadad, ed il president communal René Hohenegger suttascrivan il contract da collavuraziun correspundent. Cun questa soluziun survegnan las abitantas ed ils abitants da las vals dal sid e da l'Engiadina la pussaivladad da dumandar in document d'identitad en la vischinanza da lur domicil senza far lungs viadis e da laschar registrar las datas biometricas per il nov passaport svizzer a Zernez.

Il nov center da biometria a Zernez vegn integrà en l'administraziun communala. Profitond da sinergias persunalas e structuralas po uschia vegnir garantida ina gestiun favuraivla.


Infurmaziuns:
- cussegliera guvernativa Barbara Janom Steiner, scheffa dal departament da giustia, segirezza e sanadad, tel. 081 257 25 01
- Corsin Scandella, chanzlist communal da la vischnanca da Zernez, Tel. 081 851 47 71


Gremi: departament da giustia, segirezza e sanadad
Funtauna: rg departament da giustia, segirezza e sanadad